प्रसिद्ध दिग्दर्शक, निर्माते व अभिनेते महेश मांजरेकर यांना २०२१ मध्ये कॅन्सर झाल्याचं निदान झालं होतं. त्यानंतर त्यांनी अत्यंत धीरानं या कॅन्सरशी लढा दिला आणि त्यावर मात केली. महेश मांजरेकर यांना ब्लॅडर कॅन्सर झाल्याचे निदान झाले. त्यांचा हा लढा अनेकांसाठी प्रेरणादायी होता. त्यांनंतर त्यांच्यावर शस्त्रक्रिया झाली आता महेश मांजेरकर ‘कॅन्सरमुक्त’ आहेत. मात्र, या आजारपणातही त्यांनी एका शोचे शूटिंग केले होते.
दिग्दर्शक महेश मांजेरकर यांना जेव्हा कॅन्सर झाला त्यावेळी ते ‘बिग बॉस’ चा शो करत होते. मांजरेकरांनी बिग बॉसचा अख्खा प्रोमो कॅन्सरच्या सर्जरीनंतर केला आहे. त्यावेळी त्यांनी लघवीची पिशवी, वेगवेगळ्या ट्यूब लावून हा प्रोमो शूट केला. याबद्दल बोलताना त्यांनी असं म्हटलं की, तुम्ही मनाने जर स्ट्रॉंग असाल तर तुम्हाला कोणत्याच आजाराची भीती वाटत नाही.
सामान्यत; कॅन्सर हा धूम्रपाणामुळे होतो असा समज आहे. पण महेश मांजरेकरांनी त्यांना कॅन्सर व्हायच्या आधीच साडेदहा वर्षे धूम्रपान करणे सोडले होते. तरीदेखील कालांतराने त्यांना कॅन्सर झाला. याबद्दल त्यांनी नुकत्याच ‘आरपार’ला दिलेल्या मुलाखतीत भाष्य केले आहे. या काळात त्यांनी काही पथ्य पाळली होती का? असा प्रश्न विचारण्यात आला. याबद्दल त्यांनी काहीच पथ्ये पाळली नसल्याचे म्हटले.
याबद्दल ते असं म्हणाले की, “मला सिगारेट आवडते म्हणून मी ती पुन्हा सुरु केली. यामुळे मी माझे डॉक्टर माझ्यावर चिडले. ते मला म्हणाले की, “पागल झाला आहेस का?, तुला कॅन्सर होण्याचे हेच एकमेव कारण आहे”. यावर मांजरेकरांनी असं म्हटलं की, “मला कॅन्सर झाला त्याच्या साडेदहा वर्षे आधी मी सिगारेट सोडली होती, पण तरीदेखील मला कॅन्सर झालाच ना… and I love to smoke. हे कुणीही करू नये, हे आरोग्यासाठी खूपच घातक आहे. पण मला सवय आहे. त्याला आता काय करणार?”
यापुढे त्यांनी असं म्हटलं की, “मी डॉक्टरांना असं म्हटलं की, डॉक्टर तुम्ही मला शाश्वती द्या की, मी जर सिगारेट पिणे सोडलं तर मी कधीच मरणार नाही. हे चूक आहे मान्य आहे. पण मी त्याबद्दल मी ओके आहे आणि मी दर सहा महिन्यांनी टेस्ट करतो आणि ती करायला लागतेच. त्याला काहीच पर्याय नाही.”
