‘पिंकीचा विजय असो’ मालिकेतून घराघरात पोहोचलेली अभिनेत्री शरयू सोनावणे सध्या ‘झी मराठी’ वाहिनीवरील ‘पारू’ मालिकेत पाहायला मिळत आहे. या मालिकेत शरयूने मध्यवर्ती ‘पारू’ची भूमिका साकारली आहे. अल्पावधीत शरयूची ही भूमिका प्रेक्षकांच्या चांगलीच पसंतीस पडली आहे. पारु मालिकेतून शरयूने प्रेक्षकांच्या मनात घर निर्माण केलं आहे. साध्या भोळ्या ‘पारू’ची प्रेक्षकांना चांगलीच भुरळ पडली आहे. अभिनेत्रीने काही दिवसांपूर्वी लग्नगाठ बांधली. तिच्या या लग्नाबद्दल कोणालाच माहिती नव्हती. पण काही दिवसांपूर्वी तिने लग्नाच्या पहिल्या वाढदिवसानिमित्त काही खास फोटो शेअर केले होते. (Sharayu Sonawane Marriage)
शरयूने ‘पिंकीचा विजय असो’ मालिका सोडल्यानंतर साखरपुडा झाल्याची माहिती चाहत्यांबरोबर शेअर केली होती. १९ सप्टेंबर २०२३ला अभिनेत्रीने साखरपुड्याचे फोटो शेअर करत लिहिलं होतं, “आयुष्यभरासाठी एका व्यक्तीला त्रास देण्याचं मी ठरवलं आहे. हॅपी अ‍ॅण्ड एंगेज…गणपती बाप्पा मोरया”. त्यानंतर मे महिन्यात अभिनेत्रीने लग्नाचे फोटो शेअर करत चाहत्यांना सुखद धक्का दिला. “३६५ दिवसांच्या अविस्मरणीय आठवणी, वचनबद्धता आणि अंतहीन प्रेम. आमच्या सुंदर प्रवासाचे एक वर्ष साजरे करत आहोत” असं म्हणत तिने हे खास फोटो शेअर केले होते.
अशातच शरयूने या लग्नाबद्दलची खास आठवण सांगितली आहे. इट्स मज्जाबरोबर साधलेल्या खास संवादम्यान, शरयू असं म्हणाली की, “मी माझं लग्न अगदी खासगी पद्धतीने केलं होतं. फार कुणाला बोलावलं नव्हतं. माझे काही कुटुंबीय आणि मित्रपरिवार या लग्नसोहळ्याला उपस्थित होते. आम्ही डेस्टिनेशन वेडिंग केलं होतं. लग्नाच्या पहिल्या दिवसापासून ते शेवटच्या क्षणापर्यंतचा माहोल हा माझ्यासाठी खूप स्पेशल होता. त्यामुळे लग्नाची फक्त एक खास आठवण नाही सांगता येणार. कारण संपूर्ण लग्न हेच माझ्यासाठी स्पेशल होतं”.
दरम्यान, शरयूचा नवऱ्याचं नाव जयंत लाडे असं आहे. जयंत मराठी सिनेसृष्टीत काम करत असून तो एक फिल्ममेकर, निर्माता आहे. अभिनेता उमेश कामत, पुष्कर श्रोत्री आणि स्पृहा जोशी अभिनीत ‘अ पेईंग घोस्ट’ चित्रपटाच्या निर्मातीची धुरा जयंतने सांभाळली होती. याशिवाय उपेंद्र लिमये, प्रवीण तरडे, संजय जाधव, भरत गणेशपुरे अभिनीत ‘सूर सपाटा’ या चित्रपटाची निर्मिती देखील शरयूच्या नवऱ्याने केली होती. या चित्रपटात शरयूसुद्धा महत्त्वाच्या भूमिकेत झळकली होती.
