Nikhil Chavan Wedding: मराठी मनोरंजन विश्वातील लोकप्रिय अभिनेत्री अनुष्का सरकटे आणि अभिनेता निखिल चव्हाण यांच्या लग्नाची सध्या जोरदार चर्चा रंगली आहे. त्यांच्या लग्नाआधीच्या विधींना सुरुवात झाली असून नुकताच अनुष्काचा मेहंदी सोहळा मोठ्या उत्साहात पार पडला. या सोहळ्याचे सुंदर फोटो सध्या सोशल मीडियावर चांगलेच व्हायरल होत आहेत. दरम्यान, निखिल चव्हाणनेही आपल्या सोशल मीडिया अकाउंटवर होणाऱ्या पत्नीचे म्हणजेच अनुष्काच्या मेहंदी सोहळ्यातील काही खास फोटो शेअर केले आहेत. सध्या अनुष्का आणि निखिलच्या लग्नाच्या चर्चांना उधाण आलं आहे. येत्या २४ जूनला अनुष्का व निखिल शाही थाटामाटात लग्नबंधनात अडकणार आहेत.
याशिवाय त्याने एक मजेशीर स्टोरीही पोस्ट केली. लग्नासाठी तयार केलेल्या शूजचा फोटो शेअर करत त्याने कॅप्शनमध्ये, “या शूजचा अक्चुअल रेट २४ तारखेला ठरणार,” असे त्याने लिहिले आहे. त्याच्या या विनोदी पोस्टने चाहत्यांचे लक्ष वेधून घेतले. याशिवाय लग्नाबद्दलची त्याची उत्सुकताही दिसून आली. याचसोबत ‘लागीरं झालं जी’ मालिकेतील अभिनेत्री शिवानी बावकरने निखिलची करवली बनत एक खास फोटो शेअर केला आहे. मालिकेत भाऊ-बहीण म्हणून प्रेक्षकांच्या मनात घर करणारी ही जोडी आता निखिल आणि अनुष्काच्या लग्नातही एकत्र दिसणार असल्याने चाहत्यांमध्ये विशेष उत्सुकता निर्माण झाली आहे.
‘लागीर झालं जी’ मालिकेत निखिल आणि शिवानी यांचं बहीण-भावाचं नातं चर्चेत राहील. मालिकेत दोघेही एकमेकांच्या पाठीशी नेहमीच उभे राहताना दिसले. यानंतर आता खऱ्या आयुष्यातही शिवानी आपल्या भावाची पाठराखीण म्हणून जबाबदारी सांभाळत आहे. निखिलच्या लग्नासाठी शिवानी करवली म्हणून पोहोचली आहे. आणि ती बहीण म्हणून तिची जबाबदारी पेलवताना दिसत आहे. निखिल आणि अनुष्का ‘कारभारी लयभारी’ मालिकेमुळे एकत्र आले. थेट सुपारी फोडण्याच्या कार्यक्रमाचे फोटो शेअर करत त्यांनी प्रेमाची कबुली दिली.
