Sakav marathi web series : कालच फादर्स डे होता आणि हो, या दिवशी प्रत्येकाने आपल्या वडिलांसाठी काही ना काही पोस्ट शेअर केली होती. यादरम्यान सोशल मीडियावर एक टिझरची झलक सगळ्यांचं लक्ष वेधून घेताना दिसली. बाप-मुलाचं नातं स्पष्टपणे मांडणारा हा व्हिडीओ पटकन मनाला चटका लावून गेला. कारण या व्हिडीओमधील संवाद. मालवणी, कोकणी भाषेत सुरु झालेले हे संवाद काळजाला भिडले आणि नेमकं साकव नाव असलेलं हे गणित काय आहे याची उत्सुकता लागली. ‘साकव’ म्हणजे पूल. रस्त्यांना, मनाला, जागेला, भाषेला जोडणारा हा पूल म्हणजेच साकव. मालवणी भाषेत या पूलाला साकव म्हणतात. पण या वेबसीरिजमधील हा ‘साकव’ एका बाप-लेकाच्या नात्याला जोडणारा असल्याने अधिक आकर्षण आहे.
‘इट्स मज्जा ओरिजनल’ आणि ‘मीडिया वन सोल्युशन्स’ प्रस्तुत ही ‘साकव’ वेबसीरिज आहे. ‘इट्स मज्जा ओरिजनल’ने आजवर ‘आठवी-अ’, ‘दहावी-अ’, ‘मैत्रीचा सातबारा’, ‘पाऊस’, ‘पाऊस २’ या अनेक आशयाच्या वेबसीरिज प्रेक्षकांच्या भेटीस आणल्या. आणि त्यांनी ‘अकरावी’ या वेबसीरिजची घोषणा केली यासाठीही प्रेक्षकवर्ग उत्सुक आहेत. आणि यांत भर घालत आता एका अनोख्या आणि अतिशय महत्त्वाच्या नात्यावर भाष्य करणारी ‘साकव’ ही वेबसीरिज त्यांनी आणली आहे. समोर आलेल्या टिझरमध्ये पाठमोरे दिसणारे कलाकार टीझरची उत्सुकता ताणत आहेत. तर कोकणातील नयनरम्य वातावरणात ही वेबसीरिज शूट झाल्याचं स्पष्ट दिसत आहे.
निर्माते सौरिंद्र नाथ दत्ता यांची निर्मिती असलेली ही ‘साकव’ ही वेबसीरिज असून नितीन वाडेवाले यांनी या सीरिजच्या दिग्दर्शनाची जबाबदारी सांभाळली आहे. तर सीरिजचे लेखन नितीन पवार यांनी केले आहे. आणि प्रॉडक्शन व क्रिएटिव्ह हेड म्हणून अंकिता अशोक प्रतिभा लोखंडे यांनी संभाळली आहे. कोकणात शूट झालेल्या या वेबसीरिजमध्ये कोणते कलाकार असणार हे गुलदस्त्यात असल्याने वेबसीरिज कधी येणार याची उत्सुकता लागून राहिली आहे.
