बरेच कलाकार असे असतात जे त्यांच्या हास्यविनोदी शैलीने प्रेक्षकांच्या मनात घर करतात. या हास्यविरांच्या यादीत अव्वल स्थानावर असलेले कलाकार ज्यांनी चाहत्यांच्या मनात घर केलं आहे, असे कलाकार म्हणजे अभिनेता ओंकार भोजने व गौरव मोरे. ओंकार व गौरव यांच्या हास्यजत्रातील स्किट्सने संपूर्ण जगभरात धुमाकूळ घातला. आज जरी ओंकार हास्यजत्रेत नसला तरी त्याचे व गौरव मोरेचे स्किट्स आजही प्रेक्षक आवडीने पाहतात. या दोनही कलाकारांनी त्यांच्यातील बॉण्डिंग, त्यांच्यातील मैत्री ही त्यांच्या अभिनयातून पडद्यावर उतरवली आणि प्रेक्षकांच्या मनात घर करून राहिली. (Onkar Bhojane On Gaurav More)
गौरव व ओंकारच्या मैत्रीची सुरुवात कशी झाली, गौरव मोरेचा ओंकार कसा फॅन झाला याबाबतचा किस्सा ओंकारने ‘रेडिओ सिटी मराठी’ या युट्युब चॅनेलला दिलेल्या मुलाखतीत सांगितला. गौरव व तुझं बॉण्डिंग हे खूप उत्तम आहे, त्याबद्दल तू थोडक्यात काय सांगशील असा प्रश्न जेव्हा ओंकारला विचारला तेव्हा ओंकारने गौरवच्या भेटीदरम्यानचा किस्सा सांगितला. ओंकार म्हणाला की, “गौरव मला सिनियर आहे. आंतरमहाविद्यालयीन एकांकिका स्पर्धेचा गट आहे त्यातली एक महत्वाची स्पर्धा म्हणजे सवाई एकांकिका. सवाईच्या रात्री मी ज्या दोन एकांकिका पाहायला गेलो होतो त्या माझ्या पाहून झाल्या होत्या”.
“बऱ्यापैकी मी प्रवास करून आलो होतो त्यामुळे त्या बघून झाल्यावर मी पेंगलो. मध्यरात्री एका एकांकिकेसाठी खूप जास्त प्रेक्षक लोळून हसत होते. अगदी माझ्या शेजारच्या काकूही लोळून हसू लागल्या. त्या आवाजाने मी उठलो. आणि समोर नेमकं काय सुरु आहे हे मी पाहू लागलो, समोर सुरु होती ती एकांकिका होती ‘पडद्याआड’. आणि ही एकांकिका गौरव मोरे करत होता. त्यापुढचे तीस चाळीस मिनिट मी स्वतः अवाक होऊन ती एकांकिका पाहत होतो. आणि त्याच्या दुसऱ्या वर्षी त्याच नाट्यगृहाच्या बाहेर मी पुन्हा गौरवला भेटलो आणि त्याला म्हणालो, गेल्यावर्षी तुझी ही एकांकिका पाहिली होती. मला तेव्हापासून तुला भेटायचं होत, पण मला भेटता आलं नाही. त्याला त्यावेळी कळलं की, मी सुद्धा एकांकिका करतो. तेव्हा त्याने एकत्र काम करूया, भेटूया, असं म्हणून मला शाबासकी दिली”.
“त्यानंतर जेव्हा हास्यजत्रेच्या सेटवर आम्ही एकत्र स्किट करणार होतो, तेव्हा आम्ही विंगेत बोललो, “वो एक दिन था जब मैं आपके लिये आया था, और आज मैं आपके साथ हूँ” | त्यामुळे आमच्यात पहिल्या भेटीपासून विणलं गेलेलं नातं नंतर कामी येऊ लागलं. खरं सांगायचं तर आम्ही कामाशिवाय मित्र नाही आहोत, पण सगळ्यांना जे दिसत ते कामासाठी एकत्र आल्यावर अगदी खुलून येत.
