मराठीमध्ये आता नवनवीन चित्रपट येऊ घातले आहेत. त्यातीलच एक चित्रपट म्हणजे ‘येरे येरे पैसा ३’. गेल्या काही दिवसांपासून या चित्रपटाची जोरदार चर्चा आहे. ‘येरे येरे पैसा ३’च्या पहिल्या दोन भागांना प्रेक्षकांचा जोरदार प्रतिसाद मिळाला होता. प्रेक्षकांचा पाठिंबा आणि आवड पाहता चित्रपटाचा तिसरा भाग लवकरच चित्रपटगहांमध्ये दाखल होणार आहे. ‘येरे येरे पैसा ३’च्या स्टारकास्टचीही सध्या हवा आहे. चित्रपटाचं कथानक नक्की काय असणार? याबाबतही चाहते उत्सुक आहेत. अशातच आता चित्रपटातील नवं गाणं प्रदर्शित झालं आहे. त्याचीच जोरदार चर्चा रंगत आहे. काही तासांमध्येच गाण्याला हजारो व्ह्युज मिळाले आहेत. (Yere Yere Paisa 3 new song)
‘येरे येरे पैसा ३’च्या ट्रेलर आणि टायटल ट्रॅकला प्रेक्षकांचा तुफान प्रतिसाद मिळाला. आता चित्रपटामधील ‘उडत गेला सोन्या’ गाणं प्रदर्शित झालं आहे. हे गाणं एका वेगळ्या आणि मनोरंजक पद्धतीने सादर करण्यात आले आहे. चित्रपटाच्या पहिल्या भागात सनी आणि बबलीचे गोड प्रेम प्रेक्षकांनी अनुभवले होते. आता ‘येरे येरे पैसा ३’ मध्ये सनीचे लग्न दुसऱ्याच मुलीशी होत असल्याने बबली अस्वस्थ झाली आहे. बबली तिच्या मनातील भावना या गाण्यातून व्यक्त करताना दिसत आहे.
गाण्याला भावनिक टच देण्याचा प्रयत्न करण्यात आला आहे. ‘जेन झी’ ब्रेकअप साँग पद्धतीचं हे गाणं आहे. शिवाय गाण्याचा ठेका प्रेक्षकांना थिरकायला लावणारा ठरेल. गाण्याची खासियत म्हणजे निर्माते अमेय खोपकर यांचा मुलगा ईशान अमेय खोपकरही या गाण्यात दिसत आहे. या चित्रपटाच्या निमित्ताने ईशानचे मराठी चित्रसृष्टीत पदार्पण केले आहे. तर गाण्यात चित्रपटातील इतर कलाकारांसह सोनाली खरेचीही झलक पाहायला मिळत आहे.
सायली पंकज, रविंद्र खोमणे, राधा खुडे, सौरभ साळुंके, मुनव्वर अली, अपूर्वा निशाद व सावनी भट्ट यांच्या जबरदस्त आवाजातील या गाण्याला पंकज पडघन यांचे संगीत लाभले आहे. धर्मा प्रॉडक्शन्स प्रस्तुत अमेय विनोद खोपकर पिक्चर्स, उदाहरणार्थ निर्मित, न्युक्लिअर ॲरो पिक्चर्स निर्मित या चित्रपटाची सहनिर्मिती वर्डविझार्ड एंटरटेनमेंटने केली आहे. चित्रपटाचे दिग्दर्शन संजय जाधव यांनी केले आहे. संजय नार्वेकर, सिद्धार्थ जाधव, उमेश कामत, तेजस्विनी पंडित, विशाखा सुभेदार, आनंद इंगळे, नागेश भोसले, वनिता खरात, जयवंत वाडकर आदी कलाकार ‘येरे येरे पैसा ३’मध्ये दिसतील. येत्या १८ जुलैला हा चित्रपट सर्वत्र प्रदर्शित होईल.
