दिवंगत नेते आनंद दिघे यांच्या जीवनावर आधारित गेल्या वर्षी ‘धर्मवीर मुक्काम पोस्ट ठाणे’ हा चित्रपट आला होता. या चित्रपटाला प्रेक्षकांनी अभूतपूर्व प्रतिसाद दिला होता. या चित्रपटाने बॉक्स ऑफिसवर अनेक कोटी रुपयांची कमाई करत नवीन विक्रमदेखील केला. धर्मवीरच्या भरघोस यशानंतर धर्मवीरच्या दुसऱ्या भागाची चांगलीच चर्चा रंगली होती. दरम्यान ही चर्चा आता प्रत्यक्षात उतरण्यास सज्ज झाली आहे असं म्हणायला हरकत नाही.
धर्मवीरच्या निर्मात्यांनी काही दिवसांपूर्वीच ‘धर्मवीर २’ ची घोषणा केली होती. त्यानंतर हा चित्रपट अखेर कधी सुरू होणार याची उत्सुकता लागली होती. अशातच आता मुख्यमंत्री एकनाथ शिंदे यांच्या निकटवर्तीयांनी आता ‘धर्मवीर २’ या चित्रपटाची निर्मिती करण्याचा निर्णय घेतला आहे. नुकताच या चित्रपटाचा मुहूर्त सोहळा पार पडला आहे. ठाण्यातील आनंदाश्रमात हा मुहूर्त सोहळा पार पडला. निर्माते सचिन जोशी व मंगेश देसाई यांच्यामार्फत या मुहूर्त कार्यक्रमाचे आयोजन करण्यात आले होते. महाराष्ट्राचे मुख्यमंत्री एकनाथ शिंदे यांच्या हस्ते हा मुहूर्त सोहळा मोठ्या दिमाखात पार पडला.
या मुहूर्तावेळी मंगेश देसाई व प्रवीण तरडे यांच्यात मजामस्तीदेखील झाली. यावेळी मंगेश तरडे यांना मस्करीत “तरडे तुमचा लय मोठा परडे” असं म्हणतात. यावर उपस्थितांसह प्रवीण तरडेदेखील हसतात आणि “परडे वर येऊ नका” असं गंमतीत म्हणतात. दरम्यान या मुहूर्ताला अभिनेता प्रसाद ओक, स्नेहल तरडे, महेश लिमये, मंगेश कुलकर्णी यांच्यासह चित्रपटातील इतर कलाकारांनीदेखील हजेरी लावली होती.
आणखी वाचा – ‘झिम्मा २’ची बॉक्स ऑफिसवर घोडदौड, प्रेक्षकांचाही तुफान प्रतिसाद, चार दिवसांतच कमावले इतके कोटी
दरम्यान, धर्मवीर चित्रपटानंतर राज्यात अनेक राजकीय स्थित्यंतरे झाली आणि या स्थित्यंतरामागे या चित्रपटाने महत्वाची भूमिका बजावली होती. अशातच आज ‘धर्मवीर २’ चा मुहूर्त सोहळा पार पडला आहे. त्यामुळे लवकरच या चित्रपटाच्या चित्रीकरणाला लवकरच सुरुवात होणार आहे. तसेच या दुसऱ्या भागात प्रेक्षकांना नक्की काय पाहायला मिळणार आणि हा चित्रपट प्रेक्षकांच्या भेटीला कधी येणार? याविषयीदेखील उत्सुकता निर्माण झाली आहे.
