मालिकाविश्वातील लोकप्रिय चेहऱ्यापैकी एक म्हणजे अभिनेत्री सुरभी भावे. सुरभी भावे हिने आजवर अनेक मराठी मालिकांमधून महत्त्वपूर्ण भूमिका साकारत प्रेक्षकांची मन जिंकली. कलर्स मराठी वाहिनीवरील स्वामिनी या मालिकेमुळे सुरभीला खऱ्या अर्थाने लोकप्रियता मिळाली. या ऐतिहासिक मालिकेतील सुरभीच्या पात्राची बरीच चर्चा रंगली. तर जय मल्हार मालिकेतील ‘म्हाळसा’ या पात्राच्या भूमिकेनेही सुरभीला विशेष ओळख दिली. मालिकाविश्वामुळे चर्चेत असणारी सुरभी तिच्या वैयक्तिक कारणामुळेही चर्चेत असते. (Surabhi Bhave Daughter Video)
मालिकाविश्वात सक्रिय असणारी सुरभी सोशल मीडियावरही बऱ्यापैकी सक्रिय आहे. नेहमीच ती सोशल मीडियावरुन काही ना काही शेअर करत चाहत्यांच्या संपर्कात राहत असते. अशातच अभिनेत्रीने शेअर केलेल्या एका पोस्टमुळे ती चर्चेत आली आहे. सुरभी नेहमीच तिच्या लेकीबरोबर धमाल मस्ती करतानाचे अनेक फोटो, व्हिडीओ पोस्ट करत असते. अशातच अभिनेत्रीने तिच्या छोट्याश्या लेकीबरोबर शेअर केलेल्या एका गोड व्हिडीओने साऱ्यांचं लक्ष वेधून घेतलं आहे.
सुरभीने तिच्या स्वामीभक्त लेकीबरोबरचा एक व्हिडीओ शेअर केला आहे. यांत तिची लेक स्वामी समर्थ यांच्याबरोबर संवाद साधताना दिसत आहे. सुरभी ही स्वामीभक्त आहेच, आता आईपाठोपाठ तिची लेकही स्वामीभक्त असलेली या व्हिडीओमध्ये पाहायला मिळतेय. सुरभीने तिच्या लेकीचा हा व्हिडीओ शेअर करत, “मी स्वामी समर्थांची भक्ती करते आणि आता माझी छोटीशी लेक पण त्यांची भक्त आहे ,रोज आम्ही स्वामी आबा स्वामी आबा म्हणत त्यांच्याशी गप्पा मारतो ,आता तिला स्वामी आबांना आंबा खायला द्यायचा आहे आणि तिच्या म्हणण्यानुसार ते अंघोळीला गेलेत. किती निरागस !! आमचं संभाषण ऐका”, असं कॅप्शन देत तिने हा व्हिडीओ शेअर केला आहे.
हा व्हिडीओ पाहून सुरभीच्या लेकीची निरागसता साऱ्यांच्या पसंतीस पडत आहे. अनेकांनी या व्हिडीओला पसंती दर्शविली असून कमेंटचा वर्षाव ही केला आहे.