बॉलिवूडमधील कलाकारचं कास्टिंग काऊचची शिकार होतात असं नाही. अनेक मराठी कलाकारांनाही याचा प्रत्यक्ष अनुभव आला आहे. बरेचदा या कलाकार मंडळींनी त्यांना आलेले अनुभव चाहत्यांसह शेअर केले आहेत. तर काहींनी कास्टिंग काऊचचे अनुभव कोणाला न सांगता त्याकडे दुर्लक्ष केला आहे. छोट्या पडद्यावरील लोकप्रिय अभिनेत्री सविता मालपेकर यादेखील कास्टिंग काऊचची शिकार झाल्या होत्या. त्यांना आलेला कास्टिंग काऊचचा अनुभव नुकत्याच दिलेल्या ‘अमृता फिल्म’ या युट्यूब चॅनेलला सांगितला. (Savita Malpekar Shared Casting Couch Incident)
या मुलाखतीदरम्यान बोलताना त्या म्हणाल्या, “‘लक्ष्मी वर्सेस सरस्वती’ या मालिकेदरम्यान हा सर्व प्रकार घडला होता. कोळ्यांवर आधारित असलेल्या या मालिकेत कोळी भाषा शिकण्यासाठी मी विशेष मेहनत घेतली होती. या मालिकेमुळे मला लोकप्रियता मिळाली होती. भूमिकाही हिट झाली होती. पण त्या मालिकेवेळी स्टार प्रवाहच्या हेडने मला खूप त्रास दिला. आतापर्यंतच्या कारकिर्दीमध्ये आजवर मला कुठल्याही चॅनेल हेडने वा निर्मात्यांनी इतका त्रास दिला नव्हता तेव्हढा त्रास मला त्या हेडने दिला होता. सांगायला काही हरकत नाही. मी कोणाला घाबरत नाही. आतमधले अंतर्वस्त्र दिसतील एवढ्या पातळ साड्या मला त्यांनी नेसायला दिल्या. इथपासून त्यांनी मला त्रास द्यायला सुरुवात केली. प्रत्येक वेळेला आमच्यामुळे तुम्ही आहात’ असं म्हणत सारखा अपमान करायचे” असंही त्या म्हणाल्या.
पुढे सविता म्हणाल्या, “कुठल्या चॅनेलवर काम करत आहात माहित आहे का? आम्ही आहोत म्हणून वगैरे. पण सुरुवातीला ऐकून घेतलं. किती सहन करणार. एक मर्यादा असते सहन करायची. मी जाडी असल्यामुळे १८ वार साडी नेसायचे. कोळीन मला दररोज साडी नेसवायला यायची. मी महिनाभर नेसवून घेतली, त्यानंतर मी स्वतः शिकले. प्रोडक्शनचे पैसे वाचावेत हा हेतू होता. तेव्हा एका दिवसाचे ती कोळीण ६०० रुपये घ्यायची. म्हणून मी स्वतः शिकले आणि साडी नेसायला लागले. त्यानंतर माझी सहाय्यक अभिनेत्री माझ्या साड्यांचे त्या हेडला फोटो पाठवू लागली. अशाप्रकारे मला त्रास देऊन त्या हेडला काय आनंद मिळत होता, हे आजतागायत कळलं नाही” असं त्या बेधडकपणे म्हणाल्या.
यापुढे त्यांना देण्यात येणारी धमकीबद्दल त्या उघडपणे म्हणाल्या, “मला आव्हान केलं होतं, तुला आम्ही मालिकेतून काढून टाकलं तर कोणी इंडस्ट्रीत घेणार नाही. म्हटलं कावळ्याच्या शापाने गाय मरत नाही. तुम्ही असं म्हणून मला काम मिळणार नाही, हे तर शक्य होणार नाही. ही २०१३ची घटना आहे, त्यानंतर आज मी कुठे आहे हे सगळेच बघत आहेत” असंही त्या म्हणाल्या.