मराठी सिनेसृष्टीत भावंडांच्या बऱ्याच जोड्या नेहमीच कोणत्या ना कोणत्या कारणामुळे चर्चेत असतात. अशातच मराठी सिनेसृष्टीतील प्रेक्षकांची एक लाडकी भावंडांची जोडी म्हणजे अभिनेता संकेत कोर्लेकर आणि अभिनेत्री उमा कोर्लेकर. संकेतने याआधी छोट्या पडद्यावरील अनेक मालिकांमधून प्रेक्षकांची मन जिंकली आहेत. छोट्या पडद्यावरील ‘डॉ. बाबासाहेब आंबेडकर: महामानवाची गौरवगाथा’ या लोकप्रिय मालिकेतून संकेत प्रसिद्धीझोतात आला. या मालिकेत डॉ. बाबासाहेब आंबेडकर यांची भूमिका साकारली होती. (Sanket Korlekar On Her Sister)
स्टार प्रवाहवरील ‘सुख म्हणजे नक्की काय असतं’, ‘अजूनही बरसात आहे’ या सारख्या प्रसिद्ध मालिकेतही संकेत झळकला. आता संकेत पाठोपाठ त्याची बहीण उमानेही मालिकाविश्वात पदार्पण केले आहे. सोशल मीडियावरही संकेत व उमा यांची जोडी नेहमीच सक्रिय असते. संकेत व उमा यांची भावा बहिणीची जोडी लोकप्रिय आहे. ते दोघेही वेगवेगळ्या विषयावर मजेशीर रील करत असतात. अशातच आता संकेतच्या बहिणीने मालिकाविश्वात पदार्पण केलं आहे.
स्टार प्रवाहवरील ‘साधी माणसं’ या मालिकेत उमा एका छोट्याशा भूमिकेत पाहायला मिळाली. प्रोमोमध्ये अभिनेत्रीची झलक पाहायला मिळाली. यानिमित्ताने संकेतने त्याच्या बहिणीसाठी खास पोस्ट केली आहे. संकेतने उमासाठी खास पोस्ट लिहीत असे म्हटलं की, “उमा तू पहिल्यांदा टीव्हीवर दिसलीस आणि नेमकं मी तिथे तुला बघायला नाही आहे. पण आनंद याच गोष्टीचा आहे की, तुझ्या स्वप्नांना उशिरा का होईना पण सुरुवात झाली. स्वतःच्या जीवावर माझीही मदत न घेता ही लहानशी भूमिका मिळवलीस. तुझा उत्तम अभिनय लवकरच योग्य व्यक्तीपर्यंत पोहोचेल आणि तुला अजुन छान भूमिका मिळेल. ज्यातून तुला तुझं खरी ताकद लोकांना दाखवता येईल”.
पुढे तो म्हणाला, “आज चित्रपटसृष्टीत माझं १२ वे वर्ष सुरु आहे. या हक्काने तुला सांगेन की उतू नको मातू नको हातातलं काम अर्ध्यात सोडू नको. खूप शुभेच्छा. माझी मैत्रीण मानसीला खूप प्रेम, कारण १० दिवस तिने उमाची खूप काळजी घेतली. त्यात माझा मित्र आकाश नलावडेचे देखील कौतुक की, सेटवर त्याने उमाची पुरेपूर काळजी घेतली. खूप खूप प्रेम”, असं म्हणत त्याने बहिणीचं कौतुक केलं. संकेतच्या या पोस्टवर अनेकांनी त्याच्या बहिणीला शुभेच्छा दिल्या आहेत.
