मराठी सिनेसृष्टीत अशा बऱ्याच अभिनेत्री आहेत, ज्यांनी छोट्या पडद्यावरून आपल्या अभिनयाच्या कारकिर्दीची सुरुवात केली. पुढे आपल्या अभिनयाच्या जोरावर सगळ्यांची मनं जिंकली. त्यापैकी एक म्हणजे प्राजक्ता माळी. प्राजक्ताने आपल्या अभिनयातून प्रेक्षकांच्या मनात वेगळं स्थान निर्माण केलं आहे. तिचा बराच मोठा चाहतावर्ग आहे. ती सोशल मीडियावर बरीच सक्रिय असते. सध्या तिचे बऱ्याच नेते मंडळींसह भेटीगाठी वाढल्या आहेत. नुकतीच ती महिला व बाल विकास मंत्री आदिती तटकरींनाही भेटली होती. त्याचे फोटो तिने सोशल मीडियावर शेअर केले होते. त्यामुळे प्राजक्ता लवकरच राजकारणात प्रवेश करणार असल्याच्या चर्चा रंगत आहेत. अशातच तिने पुन्हा एकदा एक पोस्ट शेअर केली आहे. नुकतीच तिने केंद्रिय मंत्री नितीन गडकरी यांची भेट घेतली. (Prajaktta mali share a post with nitin gadkari)
प्राजक्ताने नितीन गडकरी यांच्याबरोबरच्या भेटीचे फोटो सध्या साऱ्यांचं लक्ष वेधून घेत आहेत. त्यांची नागपूरला एका कार्यक्रमाच्या निमित्ताने भेट झाली. त्यावेळचे फोटो तिने शेअर केले आहेत. त्याला कॅप्शन देत प्राजक्ता लिहीते, ‘मी आणि केंद्रिय मंत्री नितीनजी नागपूरात एका कार्यक्रमानिमित्त एका मंचावर उपस्थित राहण्याचा योग जुळून येता येता राहिला. आयोजकांना म्हटलं, सहज शक्य झालं तर मला त्यांना भेटायला खूप आवडेल आणि त्यांनी नितीनजींनी तात्काळ वेळ दिला.नवमीला नितीजींच्या निवासस्थानी ही ‘ग्रेट भेट’ झाली. त्यामुळे सबंध परिवारालाही भेटता आलं. ‘महाराष्ट्राची हास्यजत्रा, माझे आगामी प्रोजेक्ट, श्री श्री रविशंकरजी, प्राजक्तराज, समृद्धी महामार्ग’ अशा विविध विषयांवर अर्ध्या तासाहून अधिक वेळ गप्पा झाल्या. ‘श्री श्रींचं माझ्यावर पुत्रवत प्रेम आहे आणि आम्ही तुमची ‘हास्यजत्रा’ रोज बघतो’ हे ऐकून मला विशेष आनंद झाला’.
प्राजक्ता पुढे लिहीते, ‘त्यांनी निघताना त्यांच्या घरच्या देवीचं दर्शन घ्यायला लावलं. त्यांच्या कामावर लिहीली गेलेली ८-९ पुस्तकं दिली. नैसर्गिक कापसापासून बनवलेली खादी साडी दिली. जी मी लगेच दुसऱ्या दिवशी विजयादशमी उत्सवात नेसली. आयूष्यभर स्मरणात राहील अशा या भेटीसाठी वेळ दिल्याबद्दल नितीनजींचे मनापासून आभार’, असं लिहीत तिने नितीन गडकरी यांच्याबरोबर व कुटुंबसह घालवलेल्या क्षणांचा अनुभव सांगितला.
सध्या हे फोटो सोशल मीडियावर बरेच व्हायरल होत आहेत. एका नेटकऱ्याने लिहीलं, ‘त्यापेक्षा सरळ भाजपात जा. हे हळू हळू लांगुलचालन कशाला? अभिनेत्री कितीही लोकप्रिय असली तरीही महाराष्ट्रात तेवढ्यावर मतं मिळत नाहीत. तू जर चुकीच्या पक्षात असलीस, तर माझं मत तुला कधीच मिळणार नाही. महाराष्ट्र सुज्ञ आहे’, असं लिहीत त्याने महाराष्ट्राच्या राजकारणात सामील होण्यापूर्वी दहावेळा विचार कर असं खडसावलं आहे. तर दुसऱ्या नेटकऱ्याने कमेंट करत लिहीलं, ‘प्राजक्ता तू खूप गोड दिसतेस आणि तुला राजकारणात पाहण्याची आशा आहे. ते चालू ठेवू, चांगलं काम कर’, असं लिहीत प्राजक्ताला राजकारणात पाहायला आवडेल असं मत मांडलं आहे.
