Aarti Solanki Post : हिंदवी पाटील ही आपल्या दिलखेच अदाकारी आणि जबरदस्त नृत्याच्या जीवावर संपूर्ण महाराष्ट्राला भूरळ घालणारी प्रसिद्ध नृत्यांगणा म्हणून ओळखली जाते. संपूर्ण महाराष्ट्राला वेड लावणाऱ्या हिंदवीने तिच्या नृत्याने साऱ्यांना वेड करुन सोडलं. कायमच आनंदात आपल्या नृत्याविष्काराने प्रेक्षकांचे मनोरंजन करणाऱ्या हिंदवीच्या डोळ्यांत आज अश्रू आहेत. कारण पुण्यातील अतिक्रमण विभागाच्या कारवाईमध्ये हिंदवी पाटीलच्या दुकानावर हातोडा चालवण्यात आला आहे. याबाबत तिला कोणतीही पूर्वसूचना देण्यात आली नसल्याचंही हिंदवीने स्पष्ट केलं. हिंदवी पाटील हिचं पुण्यामध्ये सह्याद्री अमृततुल्य नावाचं शॉप आहे. तिनं कष्टानं ते दुकान उभारलंय.
हिंदवीच्या याच शॉपवर अतिक्रमण विभागानं कारवाई केली आहे. या कारवाईमध्ये हिंदवीच्या शॉपच्या बोर्डचं तसेच सीसीटीव्ही कॅमेऱ्यांचही मोठं नुकसान झालं. या कारवाईनंतर हिंदवीला अश्रू अनावर झाल्याचं पाहायला मिळालं. हिंदवी बरोबर घडलेल्या या घटनेवर आता मराठमोळी अभिनेत्री आरती सोळंकी हिने भाष्य केलं आहे. थेट हिंदवीचा फोटो शेअर करत तिने या प्रकरणावर आपले स्पष्ट मत मांडले आहे. आरती सोशल मीडियावर नेहमीच सक्रिय असते. न पटलेल्या मुद्द्यांवर ती स्पष्टपणे भाष्यही करते. आता हिंदवीच्या दुकानाचं नुकसान झाल्यानंतर अभिनेत्रीने यावर आपलं मत मांडलं आहे.
आरतीने पोस्ट शेअर करत, “कुठे गेले ते मिलियन फॉलोअर्स आणि नेतेमंडळी जे यांचे शोज ठेवतात. बाई नाचताना बघायला आवडते पण, कष्ट करुन पोट भरताना नाही. माझ्यासारखे लोक या मुलींना नावं ठेवतात की, यांच्यामुळे महाराष्ट्राचा बिहार झाला आहे. सत्य हे आहे की त्यांना नाचवणाऱ्यांनी बिहार केला आहे. मी या मुलीची बाजू घेत नाही आहे पण, कुठल्याही स्त्रीला अशाप्रकारे नाच करायला आवडणार नाही. ती फक्त पोट भरण्यासाठी, स्वतःचं घर चालवण्यासाठी हे करतेय. आज या हिंदवी पाटीलच्या शोवर बंदी नाही आहे पण, तिच्या दुकानावर कारवाई केली जात आहे”.
शेवटी आरती असं म्हणाली आहे की, “खरंतर, जे लोक यांचे शोज ठेवतात त्यांच्यावर कारवाई केली पाहिजे. गरीबाने कष्ट करु नये, फालतूगिरी केली तर चालेल. आज जर ती कष्ट करुन पोट भरु पाहतेय तर तिला समाजाने पाठिंबा दिला पाहिजे”. आरतीच्या या पोस्टवर अनेकांनी कमेंट करत हिंदवीला पाठिंबा दर्शविला आहे.
