वैभव तत्त्ववादी हा मराठी चित्रपटसृष्टीतील लोकप्रिय अभिनेत्यांपैकी एक आहे. त्याने मराठी चित्रपटसृष्टीत आपल्या अभिनयातून प्रेक्षकांच्या मनात वेगळा ठसा उमटवला. ‘कॉफी आणि बरंच काही’, ‘मिस्टर अँड मिसेस सदाचारी’, ‘व्हॉट्स अप लग्न’, ‘भेटली तू पुन्हा’ यासारख्या अनेक चित्रपटात त्याने काम केलं आहे. आता त्याचा ‘तीन अडकून सिताराम’ हा चित्रपटही प्रेक्षकांच्या भेटीला येणार आहे. त्याने या क्षेत्रात सुरुवात मात्र नाट्य अभिनेता म्हणून केली होती. त्याचा आज वाढदिवस आहे त्यामुळे त्यानिमित्त शेअर केलेला व्हिडिओ नेटकऱ्यांचे लक्ष वेधून घेत आहे. (Vaibhav tatwawadi share a video of him birthday)
वैभव सोशल मीडियावर बरंच सक्रिय असतो. कामासह वैयक्तिक आयुष्यात चाललेल्या घडामोडी तो सोशल मीडियावर शेअर करत असतो. नुकताच त्याने एक व्हिडिओ सोशल मीडियावर शेअर केला आहे. आज त्याचा वाढदिवस आहे. तर त्याच्या मित्रपरिवाराने त्याला सरप्राईज देत वाढदिवस साजरा केला. पारंपारिकरित्या औक्षण करतानाचा व्हिडिओ शेअर केला आहे. त्यानंतर त्यांनी मजा-मस्ती करत केकही कापला. यावेळी त्याच्या मित्रपरिवारातील अभिनेत्री पूजा सावंत, गौरव तत्ववादी, रुचिरा सावंत, अभिनेता भूषण सावंत ही मंडळी उपस्थित होती.
हा व्हिडिओ शेअर करत त्याने लिहीलं, ‘सूर्याभोवती आणखी एक फेरी. साहसी, धडे आणि प्रेमाच्या आणखी एका वर्षासाठी मी कृतज्ञ आहे. प्रत्येक क्षण जगण्यासाठी व येणाऱ्या सर्व गोष्टी कवेत घेण्यासाठी मी इथे आहे. शुभेच्छासाठी व माझ्या या प्रवासाचा भाग असण्यासाठी धन्यवाद. माझ्या आयुष्यातील त्या प्रत्येक क्षणासाठी, प्रेमासाठी व आठवणींसाठी मी कृतज्ञ आहे’, असं व्हिडिओला कॅप्शन देत त्याने आपल्या मित्रपरिवाराचे आभार मानले.
या व्हिडिओवर नेटकऱ्यांनी लाईक, कमेंटचा वर्षाव करत त्याला वाढदिवसाच्या शुभेच्छा दिल्या. या व्हिडिओवर कलाकरांनीही कमेंट करत त्याला शुभेच्छा दिल्या आहेत. एका नेटकऱ्याने वाढदिवसाच्या हार्दिक शुभेच्छा देत लिहिलं, ‘आमच्या पिढीला सतत प्रेरणा दिल्याबद्दल आणि आम्हाला प्रेरित करण्यासाठी बेंचमार्क सेट केल्याबद्दल धन्यवाद’, असं म्हणत त्याला एका वेगळ्या अंदाजात शुभेच्छा दिल्या आहे.