Sankarshan Karhade Emotional Poem : आई सारखं दैवत साऱ्या जगतात नाही. आई या शब्दाची ताकद कोणत्याही संकटाला हरवू शकते. आई या शब्दाचा अर्थच आहे आ म्हणजे आत्मा आणि ई म्हणजे ईश्वर. आत्मा अन् ईश्वर एकत्र असतील तिथे अपयश, भीती, काळजी ही नाहीच. प्रत्येकाच्या आयुष्याचा अविभाज्य भाग म्हणजे आई. प्रत्येक आई आपल्या मुलांवर भरभरुन प्रेम करताना दिसते. आता सोशल मीडियाचं युग असल्याने अनेकजण आपल्या आईबद्दल सोशल मिडियाद्वारे व्यक्त होतात. अशातच आता एका मराठमोळ्या अभिनेत्याने आईबाबत केलेली कविता सध्या व्हायरल झाली आहे. ‘झी मराठी’ वाहिनीच्या पुरस्कार सोहळ्याला अभिनेता संकर्षण कऱ्हाडेने आईबाबत सादर केलेली कविता अनेकांच्या मनाला भावली.
‘झी मराठी’ पुरस्कार सोहळ्यात संकर्षणच्या या कवितेवर अनेकांच्या डोळ्यात पाणी आलेलं पाहायला मिळालं. अनेक कलाकार यावेळी भावुक झाले.
आईसाठीची संकर्षणची कविता,
आज म्हणलं स्वतःला जाब विचारावा,
आईसाठी आपण काय करतो आढावा घ्यावा,
आपण पहाटे उठलोय आणि आई दुपारी असं कधी घडलंय,
आपण जेवायच्या आधी आईचं ताट आपण कधी वाढलंय,
बरं तुम्ही घरी येताना आईसाठी कधी काय आणता,
बरं तुम्ही सांगा तुमच्या आईचा फेव्हरेट कलर कोणता?,
आईला हवं ते मिळू दे अशी प्रार्थना कधी केलीय,
पाहिलं का आई शेवटची कधी ऑनलाईन आलीय,
तिच्या बर्थडेची पार्टी तिच्या मैत्रिणींना बोलावून देतो?,
तिने केलेला पसारा कधी आपण आवरतो,
तरीही बाळाला कोणी बोललं की तिचं मन येत भरुन,
आपण मात्र बोलताना शिव्या आईवरुन,
लक्षात ठेवून सतत ती हात पसरते, नशिबापुढे, देवापुढे,
पण स्वतःची मात्र दुपारची बीपीची गोळी विसरते,
आईची आई होऊन कधीतरी बाळांनो वागा नं,
तिचा खडबडीत हात हातात घेऊन एकदा बघा नं,
कितीही कर्तृत्व गाजवा तुम्ही झेप कमी पडते,
आईने कडेवर घेतल्यावरचं आपली उंची वाढते,
उगाच कशाला त्या अध्यात्म आणि श्रद्धेच्या गप्पा हाणता,
आईच्या पोटी जन्माला येतात अन् देव कुठे म्हणता,
आईला सतत मुलांचा ध्यास, त्यांच्या प्रेमाची धुंदी,
बाळांनी गंमत आणली नाही तरी आई सदा आनंदी,
नका करु स्पर्धा कुणाशी, नको कुणाचा हेवा,
जग जिंकायचंय का तुम्हाला आईच्या पायावर डोकं ठेवा.
