Bigg Boss Marathi season 5 : सिनेमाविश्वात असे बरेच कलाकार आहेत जे त्यांच्या स्पष्ट वक्तेपणामुळे चर्चेत असतात. बरेचदा ही कलाकर मंडळी न पटणाऱ्या मुद्द्यांवर सडेतोड भाष्य केल्याने व पोस्ट शेअर केल्याने चर्चेत येतात. तर काही कलाकार मंडळी अशी आहेत जे त्याच्या वैयक्तिक आयुष्याबाबतचे अनेक अपडेटही सोशल मीडियावरुन पोस्ट करताना दिसतात. यापैकीच एक अभिनेता म्हणजे पुष्कर जोग. पुष्करने बरेचदा न पटणाऱ्या व विविध अंगी विषयावर भाष्य करत त्याचं मत मांडलं आहे. मात्र पुष्कर सध्या चर्चेत असलेल्या ‘बिग बॉस मराठी’ या रिऍलिटी शोमुळे चर्चेत आला आहे.
सध्या ‘बिग बॉस मराठी’चा पाचवा सीझन धुमाकूळ घालताना दिसत आहे. अगदी कमी वेळात या सीझनने प्रेक्षकांची मन जिंकली. ‘बिग बॉस मराठी’च्या घरात स्पर्धक धुमाकूळ घालताना दिसत आहेत. दरम्यान, ‘बिग बॉस’ मराठीच्या घरात स्पर्धकांमध्ये वाद होताना पाहायला मिळत आहेत. यंदाच्या पर्वात ज्येष्ठ अभिनेत्री वर्षा उसगांवकर ही आहेत. या पर्वात अनेक स्पर्धकांकडून वर्षा यांचा अपमान झालेला पाहायला मिळाला. मात्र संबंध महाराष्ट्राने पेटून उठताच भाऊच्या धक्क्यावर त्यांची माफीही मागितली गेली.
आणखी वाचा – विराट कोहलीच स्वतःच्या मुलांसाठी बनवतो जेवण, लंडनमध्येच थाटला संसार, पत्नीला त्रास नको म्हणून…
सध्या घरात निक्कीची अरेरावी पाहायला मिळत आहे. जेवण आणि घरातल्या कामांवरुन झालेल्या भांडणांमध्ये निक्कीने वर्षा उसगांवकरांबद्दल पुन्हा एकदा चुकीचे शब्द वापरल्याचं पाहायला मिळालं. निक्कीशी कॅप्टन म्हणून वर्षा बोलायला गेल्या तेव्हा, “तुमच्यासमोर मी आत बाथरुममध्ये जाऊन दाखवेन. मला अडवणारा अजून जन्माला आलेला नाही. तुम्ही मला हुकूम देऊ नका. कॅप्टन आहात, तर कॅप्टनच राहा. इथे बादशाह नका होऊ. माझा बाप बनू नका. समजलं ना? कॅप्टनच्या हैसियतमध्ये राहा”, असं म्हटलं.
निक्कीकडून वर्षा यांचा झालेला अपमान ‘बिग बॉस’ फेम अभिनेता पुष्कर जोगला खटकला. यापूर्वीही वर्षा यांचा अपमान होताच पुष्करने स्पर्धकांना खडेबोल लगावले. आता पुन्हा एकदा निक्कीला धडा शिकवायला पुष्करने केलेली एक पोस्ट लक्ष वेधून घेत आहे. “मला एकदा घरी पाठवा. वर्षा उसगांवकर मॅमचा एवढा अपमान मी सहन करु शकत नाही. अरे मर्दांनो उठा. त्या फिक्कीचा माज उतरवा #कहर”, असं कॅप्शन देत त्याने राग व्यक्त केला आहे.
