gaurav more buys new home :असे अनेक कलाकार आहेत जे नेहमीच चाहत्यांसह आनंदाची बातमी शेअर करतात. बरेचदा घर घेतल्याचा, गाडी घेतल्याचा, आई-वडील झाल्याचा आनंद ते चाहत्यांसह शेअर करतात. अशातच आता एका मराठमोळ्या अभिनेत्याने नवं घर घेतल्याचा आनंद चाहत्यांसह शेअर केला आहे. हा आनंद त्या अभिनेत्यासाठी खूप खास आहे. कारण ताडपत्रीच्या घरात राहून दिवस काढल्यानंतर जेव्हा फ्लॅटची चावी हातात येते तो आनंद वेगळाच म्हणायला हवा. हो. हा अभिनेता म्हणजे गौरव मोरे. गौरव सध्या ‘चला हवा येऊ द्या’ या कार्यक्रमात त्याच्या विनोदी अंगाने रसिकांच्या मनात घर करुन आहे.
आजवर गौरवने महाराष्ट्राची हास्यजत्रा या लोकप्रिय कार्यक्रमातून प्रेक्षकांच्या मनावर अधिराज्य गाजवलं. मात्र त्याने अर्ध्यातूनचा या कार्यक्रमाबरोबरचा प्रवास संपविला. त्यानंतर गौरव चित्रपटांकडे वळला. सध्या गौरव ‘चला हवा येऊ द्या’ या लोकप्रिय कार्यक्रमातून प्रेक्षकांच्या भेटीस येत आहे. सोशल मिडियावरही गौरव बऱ्यापैकी सक्रिय असतो, नेहमीच तो काही ना काही शेअर करत चाहत्यांच्या संपर्कात राहतो. अशातच गौरवने नव्या घराचा ताबा मिळाल्याची गुडन्यूज चाहत्यांना दिली आहे.
गौरव मोरेचा सिनेविश्वातील प्रवास हा काही सोप्पा नव्हता. फ़िल्टर पाडामधून येत सिनेविश्वात कोणाचाही वारसा नसताना गौरवने स्वतःचा ठसा उमटविला. आता या गौरवचं आणखी एक स्वप्न पूर्ण झालं आहे. गौरवने लहानाचा मोठा झालेल्या फिल्टर पाडामध्येचं स्वतःचं बिल्डिंगमध्ये घर घेतलं, आणि त्याला त्याच्या या नव्या फ्लॅटची चावीही मिळाली. याबाबत पोस्ट शेअर करत तो म्हणाला, “फ़िल्टर पाडा ते पवई हा प्रवास बघताना खूप छोटा वाटतो, पण तो पूर्ण करण्यासाठी खूप वर्ष लागली आहेत. जिथे राहतो तिथेच आपलं घर असाव हे कायम मनात होतं”.
आणखी वाचा – “आपण नवरा-बायको म्हणून पुढे जायला नको”, संसाराच्या सुरुवातीत मोठं विघ्न, पारूचा निर्णय आदित्यला पटणार का?
पुढे त्याने लिहिलं, “लहानपणापासुन वाटत होतं जिथे राहतो तिथेच घर घ्यायचं आणि आज ते स्वप्न खऱ्या अर्थाने सत्यात उतरलं आणि काल दिनांक २५-९-२०२५ रोजी आम्हाला आमच्या पवईच्या नवीन घराचा ताबा मिळाला. ताडपत्री ते फ्लॅट असा हा प्रवास आहे. आणि काल घरच्यांना त्या घराचा आनंद घेताना बघुन मन भरून आलं आणि वाटलं आपण आपल्या परिवारासाठी काहीतरी केलं. माझी नाळ कायम फ़िल्टर पाडा आणि पवई सोबत जोडली गेली आहे आणि ती कधीच तुटणार नाही. माझ हे स्वप्न पूर्ण केल्याबद्दल मी म्हाडाचे मनापासुन आभार मानतो”. गौरवच्या या पोस्टवर अनेकांनी शुभेच्छांचा वर्षाव केला आहे.
