शहरात कामासाठी कितीही रमलो तरी प्रत्येक व्यक्तीची नाळ ही त्याच्या गावच्या मातीशी जोडलेली असतेच. कलाकार मंडळींचंही असंच काहीसं आहे. सुप्रसिद्ध अभिनेते व दिग्दर्शक प्रवीण तरडे यांनाही गावच्या मातीची अधिक ओढ आहे. कामामधून अधिक वेळ मिळाला की, ते मुळशी तालुक्यातील त्यांच्या गावी जातात. तिथल्याच मातीत रमतात. दरम्यान त्यांनी गावचे बरेच व्हिडीओ सोशल मीडिया अकाऊंटद्वारे शेअर केले आहेत. आताही प्रवीण यांनी गावच्या शेतातील व्हिडीओ शेअर केला आहे. त्याचीच सध्या सोशल मीडियावर चर्चा सुरु आहे. प्रवीण शेत कामात मदत करत आहेत. त्यातच त्यांनी एक नवा प्रयोग केला होता. त्यांनी त्यांच्या शेतातील विविध भागांमध्ये सफरचंदाची झाडं लावली होती. (Pravin Tarde village video)
प्रवीण यांनी त्यांच्या शेताच्या बांधावर, रानमळ्याच्या जागेत सफरचंदाची झाडं लावली. त्यातलं शेताच्या बांधावर लावलेलं झाड टिकलं. ते आता मोठंही झालं आहे. त्याचदरम्यानचा एक व्हिडीओ त्यांनी शेअर केला आहे. या व्हिडीओमध्ये लावणीसाठी ते वडिलांची मदत करत असावेत असं दिसत आहे. डोक्यावर प्लास्टिकचं इरलं घेऊन ते शेतीच्या कामात जुंपले. पावसाच्या सरी आणि शेतीची कामं करण्याचा आनंद त्यांच्या चेहऱ्यावर स्पष्टपणे दिसून येत आहे.
आणखी वाचा – रितेश देशमुखला मोठा धक्का, जवळच्या व्यक्तीचं निधन, म्हणाला, “माझा मोठा भाऊ, मार्गदर्शक…”
सफरचंदाचं झाड प्रवीण यांनी दाखवलं. तसेच त्यांनी याबाबत सांगितलं. प्रवीण म्हणाले, “दोन ते तीन वर्षांपूर्वी आम्ही एक प्रयोग केला होता. हे सफरचंदाचं झाड आहे. मुळशी तालुक्यात आजपर्यंत सफरचंदाचं झाड लावण्याचा प्रयोग झालेला नाही. सफरचंदाची झाडं आणून आम्ही आमच्या वेगवेगळ्या शेतामध्ये लावली होती. आमच्या गावातील हा खालचा भाग आहे. जिथे आम्ही भातशेती करतो. भातशेतीच्या बांधावर आम्ही हे झाड लावलं होतं. आणि काही झाडं दऱ्यात लावली होती”.
आणखी वाचा – अंकिता लोखंडेच्या चमकदार त्वचेचं रहस्य आहे तरी काय?, चांदीचा ग्लास, मॅजिक वॉटर आणि…
“दऱ्यात म्हणजे रानात देवराई असते तिथे लावलं होतं. त्यातलं एक झाड हे व्यवस्थित जगलं. झाड टिकलं आणि मोठं झालं आहे. या झाडाला सफरचंद येतील नाही येतील हा नंतरचा भाग आहे. पण हे झाड बांधावरती जगलं. हा प्रयोग जर यशस्वी झाला तर काहीतरी इथे नवीन करण्याची आमची एक कल्पना आहे. उन्हाळ्यामध्ये झाड टिकवून ठेवणं खूप अवघड असतं. माझे वडिलच इकडे सगळं काम करतात”. प्रवीण यांचं सोशल मीडियाच्या माध्यमातून कौतुक होत आहे.
