Ashok Saraf Son : ज्येष्ठ अभिनेते अशोक सराफ यांना नुकताच राष्ट्रपती द्रौपदी मुर्मू यांच्या हस्ते पद्मश्री पुरस्काराने सन्मानित करण्यात आले. अभिनयसृष्टीतील त्यांच्या भरीव योगदानाबाबत त्यांना पद्मश्री पुरस्काराने सन्मानित केले. यानंतर संपूर्ण कलाविश्वातून त्यांच्यावर शुभेच्छांचा वर्षाव होताना पाहायला मिळत आहे. दिल्ली येथे झालेल्या या सन्मान सोहळ्यात त्यांची पत्नी निवेदिता सराफ, भाऊ आणि जवळचे कुटुंबीय उपस्थित होते. मात्र या सोहळ्याला त्यांचा लेक अनिकेत सराफ उपस्थित राहू शकला नाही. या आनंदाच्या बातमीनंतर काल अशोक मामांचा वाढदिवस झाला. यावेळीही सर्वांनी त्यांना वाढदिवसाच्या शुभेच्छा दिल्या. वाढदिवसानिमित्त त्यांची पत्नी निवेदिता यांनीही भावना मांडल्या.
यापाठोपाठ आता अशोक सराफ यांच्या वाढदिवसानिमित्त त्यांच्या लेकानेही वडिलांसाठी खास पोस्ट लिहिली आहे. पद्मश्री पुरस्काराने सन्मानित झाल्यानंतर त्यांच्यासाठी अभिमानास्पद अशी पोस्ट आणि वाढदिवसाच्या शुभेच्छा पोस्टद्वारे दिल्या आहेत. या पोस्टद्वारे त्याने ‘बाबांचा खूप अभिमान वाटतोय’ असं म्हटलं आहे. शिवाय पद्मश्री सोहळ्याला तो येऊ शकला नाही मात्र त्याने हा सोहळा लाईव्ह प्रेक्षेपणाद्वारे पाहिला असल्याचं म्हटलं. अनिकेत कामानिमित्त सध्या परदेशात आहे. त्यामुळे तो वडिलांच्या या खास क्षणाला उपस्थित राहू शकला नाही.
अनिकेत सराफ लिहितो, “मला आजही आठवतंय. माझ्या वडिलांना महाराष्ट्र राज्याचा सर्वोच्च सन्मान म्हणजेच महाराष्ट्रभूषण पुरस्कार साधारण वर्षभरापूर्वी प्रदान करण्यात आला होता. त्यावेळी मी प्रचंड आनंदी झालो होतो, मला त्यांचा खूप अभिमान वाटत होता. तो भव्य क्षण कोणीच शब्दांत व्यक्त करू शकणार नाही असाचं होता आणि आता पुन्हा एकदा बाबांमुळे माझा आनंद द्विगुणित झाला आहे. आज मी त्यांच्यापासून हजारो मैल दूर आहे पण, लाइव्ह ब्रॉडकास्टवर संपूर्ण पद्मश्री सोहळा पाहताना मन भरुन आलं”.
पुढे त्याने म्हटलं आहे की, “त्यांना पद्मश्री पुरस्कार स्वीकारताना पाहून खरंच खूप अभिमान वाटला. म्हणूनच या खास दिवशी मी माझ्या वडिलांना खूप-खूप शुभेच्छा देतो. त्यांच्या कामाचं, अभिनयाचं कौतुक सगळेच करतात मात्र, आज मी अशोक सराफांमधले प्रेमळ वडील अन् त्यांच्या माणुसकीचं विशेष कौतुक करतो. वाढदिवसाच्या हार्दिक शुभेच्छा. तुम्हाला खूप-खूप प्रेम आणि शुभेच्छा!”.
