Vijaya & Nikhil Dance : ‘झी मराठी’वरील लोकप्रिय मालिका ‘कमळी’ सध्या प्रेक्षकांच्या विशेष पसंतीस उतरली असून, टीआरपीच्या शर्यतीत सातत्याने टॉप-५ मध्ये आपलं स्थान टिकवून आहे. दमदार कथा, लक्षवेधी ट्विस्ट आणि कलाकार मंडळी यामुळे ही मालिका प्रेक्षकांमध्ये चांगलीच गाजताना दिसते. कमळी आणि ऋषी यांची ऑनस्क्रीन केमिस्ट्री प्रेक्षकांना आवडली आहे. मालिकेत नुकताच दाखवण्यात आलेला न्यू इयर पार्टीचा सीक्वेन्स प्रेक्षकांचं लक्ष वेधून घेत आहे. या पार्टीदरम्यान अनिका एक मोठा डाव आखते. ती कमळीच्या जेवणात नशेचं औषध मिसळते. या ट्रॅकमुळे मालिकेच्या कथानकात मोठा ट्विस्ट आल्याचं पाहायला मिळणार आहे.
या खास न्यू इयर पार्टीसाठी मालिकेतील सर्व कलाकार रेट्रो लूकमध्ये झळकले. कमळीने घातलेला सुंदर पंजाबी ड्रेस, दोन मोठ्या वेण्या आणि केसात माळलेलं पांढऱ्या गुलाबाचं फूल या लूकमध्ये ती खूपच आकर्षक दिसत आहे. कमळीची भूमिका साकारणाऱ्या अभिनेत्री विजया बाबरने या रेट्रो लूकमधील फोटो सोशल मीडियावर शेअर केले असून, त्याला चाहत्यांचा भरभरून प्रतिसाद मिळत आहे.
या सिक्वेन्समध्ये कमळी आणि ऋषीने एका बॉलीवूड गाण्यावर सादर केलेला डान्सही विशेष चर्चेत आहे. ऋषीच्या भूमिकेत दिसणारा अभिनेता निखिल दामले हा उत्कृष्ट डान्सर असल्याचं प्रेक्षकांना आधीपासूनच माहिती आहे. सध्या सुरू असलेल्या ट्रॅकनुसार रेट्रो थीम ठेवण्यात आली असून, त्याचाच भाग म्हणून निखिल आणि विजयाने एकत्र डान्स करत एक खास व्हिडीओ शेअर केला आहे. या रेट्रो डान्स व्हिडीओवर चाहत्यांनी भरभरून कौतुकाचा वर्षाव केला असून, लाईक्स आणि कमेंट्सचा वर्षाव केला. दरम्यान, हा व्हिडीओ शेअर करताना विजयाने मजेशीर कॅप्शन देत लिहिलं आहे, “आम्हाला एक रील पोस्ट करण्यासाठी तब्बल २०० एपिसोड लागले!” असं लिहिती तिने २०० एपिसोड पूर्ण झाल्याचं आनंद व्यक्त केला आहे.
