Jasmin Bhasin Health Update : टीव्ही अभिनेत्री जस्मिन भसीन गेल्या दीड महिन्यांपासून आरोग्याशी संबंधित समस्यांशी झुंजत आहे. गेल्या महिन्यात, तिच्या वाढदिवसाच्या वेळी, तिला दुबईतील रुग्णालयात दाखल करण्यात आले होते, ज्याची छायाचित्रे तिच्या प्रियकर आणि अभिनेता अली गोनीने शेअर केली होती. दरम्यान, जास्मिनने आता तिच्या प्रकृतीबाबत मोठा खुलासा केला असून डॉक्टरांना गंभीर आजार असल्याचा संशय आहे आणि तिच्यावर उपचार सुरू आहेत.
अलीकडेच, पिंकविलाशी झालेल्या संभाषणात जास्मिन म्हणाली, “दुबईला पोहोचल्यानंतर मला अस्वस्थ वाटू लागले आणि दुसऱ्या दिवशी मला ताप आल्यासारखे वाटले. मला वाटले की हे थकव्यामुळे झाले आहे, म्हणून मी पॅरासिटामॉल ड्रिप आणि IV द्रवपदार्थ घेतले. पण ३ दिवस ताप उतरला नाही आणि माझी प्रकृती आणखीनच बिघडली. मग मी अली आणि मित्रांना मला हॉस्पिटलमध्ये नेण्यास सांगितले”.
जस्मिन पुढे म्हणाली, “शरीरातील संसर्ग आणि जळजळ किती आहे हे जाणून घेण्यासाठी डॉक्टरांनी सीआरपी चाचणी केली, ज्यामध्ये सामान्य पातळी 0 ते 5 आहे. परंतु माझे प्रमाण 323 होते, जे माझ्यासाठी खूप धोकादायक आहे. डॉक्टरांनी मला सांगितले की माझ्या आतड्याच्या एका भागात सूज आली आहे, त्यामुळे गंभीर आजाराचा संशय आहे. अजूनही तपास सुरू असून उपचार सुरू ठेवण्यासाठी मी भारतात आले आहे”. आता जस्मिन तिच्या तब्येतीबद्दल म्हणाली, “देवाच्या कृपेने मी आता बरी आहे, पण गेल्या दीड महिन्यापासून मी वारंवार आजारी पडत होते. आता ‘मी ठीक आहे’ म्हणायलाही भीती वाटते. मला वाटते की देव मला थोडा वेळ थांबण्याचा आणि स्वतःसाठी वेळ काढण्याचा आणि स्वतःवर प्रेम करण्याचा इशारा देत आहे. आता मी पूर्वीपेक्षा जास्त काळजी घेत आहे”.
जस्मिनला टर्मिनल आयलिटिस नावाचा आजार आहे, ज्यामध्ये लहान आतड्यात सूज येते. या आजारामुळे पोटदुखी, उलट्या, सूज आणि इतर अनेक समस्या उद्भवतात. हे दीर्घकाळ चालू राहिल्यास समस्या वाढू शकते. कामाबद्दल बोलायचे तर ती अलीकडेच ‘खतरों के खिलाडी 15’ या रिॲलिटी शोचे शूटिंग करत होती, जो 1 ऑगस्टपासून टीव्हीवर प्रसारित होणार आहे.
