टेलिव्हिजन अभिनेत्री हिना खान ही खूप लोकप्रिय अभिनेत्री आहे. आजवर तिने अनेक मालिका,चित्रपट व वेबसीरिजममध्ये महत्त्वपूर्ण भूमिका साकारल्या आहेत. मात्र तिच्या तब्येतीबद्दल एक महत्त्वाची अपडेट समोर आली. हिनाला स्तनांचा कर्करोग झाल्याचे निदान झाले होते आणि त्यानंतर मनोरंजन क्षेत्रात एकच खळबळ उडाली. रोगाचे निदान झाल्यानंतर ती पहिल्या केमोथेरपीसाठी रुग्णालयात पोहोचल्याचा व्हिडीओदेखील व्हायरल झाला आहे. हिनानेदेखील या आजाराला झुंज देणार आणि जिंकणार असा आत्मविश्वास दर्शवला आहे. मात्र स्तनाच्या कर्करोगामुळे मनोरंजन क्षेत्रातील एका प्रसिद्ध अभिनेत्रीने शस्त्रक्रिया करुन स्तन काढले होते. (angelina jolie breast cancer)
हॉलीवूडमधील प्रसिध्द अभिनेत्री अँजेलीना जोलीला स्तनांचा कर्करोग होऊ शकतो अशी शक्यता होती. पुढे काही जास्त होऊ नये म्हणून तिने आपले स्तनच काढून टाकले. ११ वर्षांपूर्वी अँजेलीनाला कर्करोग होऊ शकतो या भीतीने तिने डबल मास्टेक्टॉमी शस्त्रक्रिया केली होती. जनुकीय समस्यांमुळे स्तनांचा किंवा गर्भ पिशवीचा कर्करोग होऊ शकतो असे तिच्या डॉक्टरांनी सांगितले होते. डॉक्टरांच्या म्हणण्यानुसार तिला ८७ टक्के स्तनांचा कर्करोग व ५४ टक्के गर्भाशयाचा कर्करोग होऊ शकतो अशी शक्यता वर्तवली होती.
न्यूयॉर्क टाइम्सच्या एका अहवालात अनेक गोष्टींचा खुलासा करण्यात आला होता. अँजेलीनाने त्यात लिहिले होते की, “जेव्हा मला सत्य समजले तेव्हा मी सतर्क झाले होते. त्यामुळे मी स्वतःला वाचवण्याचा प्रयत्न केला. मी शस्त्रक्रिया करण्याचा निर्णय घेतला. याची सुरुवात मी स्तनापासून केली कारण गर्भाशयाच्या कर्करोगापेक्षा स्तनाचा कर्करोग होण्याची अधिक शक्यता होती”.
पुढे ती म्हणाली की, “स्तन काढल्यानंतर कर्करोग होण्याची शक्यता केवळ ५ टक्केच राहिली. मी माझ्या मुलांना सांगते की कर्करोगामुळे आईला गामावणार नाहीत. ते माझ्या केवळ लहान जखमाच बघू शकतात बाकी काही नाही”.
त्यानंतर ती म्हणाली की, “मला खात्री आहे की माझ्या अनुभवामुळे इतर महिलांना खूप फायदा होईल. स्तन काढल्याने माझ्या मातृत्वावर कोणताही परिणाम झाला नाही. मेसेक्टॉमी शस्त्रक्रिया करणाऱ्या महिलांना त्यांचे सौंदर्य परत मिळवता येईल. पण ज्या माहिला आजारी नाहीत त्यांना फायदा होणार नाही”. अँजेलीनाच्या या उचलल्या गेलेल्या पावलामुळे अनेकांनी आश्चर्य व्यक्त केले होते. मात्र यामुळे अनेक महिलांना प्रेरणा मिळाली.