जुन्या काळातील प्रेक्षकांची आवडती जोडी म्हणजे धर्मेंद्र व हेमा मालिनी. या जोडीचे नाव मनोरंजन क्षेत्रामध्ये आदराने घेतले जाते. जेव्हा ही जोडी पाहिल्यांदा चित्रपटामध्ये दिसली तेव्हा प्रेक्षकांनी खूप पसंती मिळाली. धर्मेंद्र व हेमा यांची प्रेमकहाणीची चर्चा आजही होत असते. पहिली पत्नी व चार मुलं असतानाही धर्मेंद्र यांना हेमा मालिनी आवडू लागल्या होत्या. मिळालेल्या माहितीनुसार, धर्मेंद्र यांनी हेमा मालिनी यांच्याबरोबर लग्न करण्यासाठी आपला धर्मही बदलला होता.
हेमा व धर्मेंद्र यांच्या लग्नाबाबत एक खुलासा स्वतः हेमा मालिनी यांनी केला होता त्याची चर्चा सर्वत्र होत आहे. सिम्मी गरेवाल यांच्या एका शोमध्ये हेमा मालिनी उपस्थित होत्या. त्यावेळी त्यांनी धर्मेंद्र यांच्याबरोबर लग्न करण्याबाबतचा एक मोठा खुलासा केला होता. ज्यामुळे सर्वच जण हैराण झाले होते. त्यांनी मुलाखतीमध्ये सांगितले की, “मी धर्मेंद्र यांच्यावर प्रेम करत होते पण त्यांच्याशी लग्न करण्याचा अजिबात विचार करत नव्हते. ते दिसायला खूप चांगले होते पण याचा अर्थ असा नाही की मी लग्न करेन. तरीही मी त्यांच्याबरोबर काम करणं सोडलं नाही. पण काम करताना त्यांच्याबरोबर लग्न करेन असा विचार केला नव्हता. पण कुठे ना कुठे विचार करत होते की लग्न करेन तर त्यांच्यासारख्याच कोणाशीतरी करेन. पण शेवटी आमचं लग्न झालंच”.
हेमा मालिनी पुढे म्हणाल्या की, “आम्ही दोघांनी एकत्रित खूप चित्रपट केले आहेत. एकत्र वेळ घालवल्याने आमचं नातं अजूनच घट्ट झालं. तो दिवस अजूनही लक्षात आहे जेव्हा मी त्यांना लग्नासाठी अचानक विचारलं आणि ते लगेच तयारही झाले”.पुढे त्यांनी सांगितले की, “कोणाचेही आई-वडिल आपल्या मुलीचं दुसरी पत्नी म्हणून लग्न करुन देणार नाहीत. पण माझ्यासाठी निर्णय घेणं खूप कठीण होतं. आम्ही खूप वेळ एकत्र घालवला होता त्यामुळे अचानक दुसऱ्या कोणाबरोबर लग्न करणे मला योग्य नाही वाटलं. त्यामुळे मी त्यांना फोन केला आणि म्हंटलं की तुम्हाला आता माझ्याशी लग्न करावं लागेल तेव्हा ते म्हणाले की हा मी तुझ्याशी लग्न करेन”.
धर्मेंद्र व हेमा मालिनी यांना ईशा व अहाना अशा दोन मुली आहेत. ईशाने अनेक हिंदी चित्रपटांमध्ये काम केलं आहे.
