सध्या रंगभूमीवर विविध क्षेत्रात व्यस्त असलेले कलाकार कधी काळी एकमेकांच्या सुख दुःखाच्या काळात सोबत उभे होते हे हे तितकंच खरं आहे. जुन्या मित्रांची अशीच एक जोडी म्हणजे दिगदर्शक केदार शिंदे आणि अभिनेते अरुण कदम. केदार शिंदे यांनी आजोबा आणि लोकशाहीर म्हणजे प्रसिद्ध असलेले शाहीर साबळे यांच्या जीवनप्रवासावर आधारित महाराष्ट्र शाहीर हा चित्रपट नुकताच प्रदर्शित केला आणि प्रेक्षकांचा त्याला भरभरून प्रतिसाद देखील मिळताना दिसतोय. चित्रपटाच्या प्रमोशन साठी महाराष्ट्र शीर चित्रपटाची टीम नुकतीच महाराष्ट्राच्या हास्यजत्रेच्या मंचावर गेली होती त्यावेळी अरुण कदम आणि केदार शिंदे यांची भेट झाली. भेटी दरम्यान काही जुन्या आठवणींना उजाळा देत केदार शिंदे यांनी एक पोस्ट लिहिली आहे.(Arun Kadam Kedar Shinde)
पोस्टच्या कॅप्शन मध्ये त्यांनी लिहिलं आहे ‘बरेच दिवस झाले या आमच्या मित्राविषयी अरूण विषयी लिहायचं होतं. पण जमलंच नाही. महाराष्ट्र शाहीर च्या प्रमोशनसाठी #महाराष्ट्राचीहास्यजत्रा मध्ये गेलो होतो. त्यावेळेच्या हा खास फोटो. अरूण आणि माझी मैत्री १९९० पासून. माझ्या अनंत सुखदुःखात तो महत्वपूर्ण भूमिकेत होता. आमच्या सगळ्यांमध्ये लवकर सेटेल होणारा, घसघशीत कमाई करणारा पहिला अरूणच. आर्थिक विवंचना असल्यावर हातात पैसे ठेवणारा अरूणच.
कित्येक दिवस मी त्याच्या बीएमसी ॲाफिसात काढल्या आहेत. त्याच्या जीवावर पोट भरलं आहे. आमच्यात वयाने खुप मोठा पण, त्याची मस्करी करताना ते कधीच डोक्यात येत नाही. गण गवळण बतावणी आम्ही दोघं लोकधारामधे सादर करायचो. त्याच्या डोळ्यात दिसायचं की, पुढचं वाक्य तो विसरला आहे. पण अविर्भाव असा असायचा की, समोरचा वाक्य विसरला आहे. आता आम्ही एकत्र फार काम करत नाही. पण त्याची प्रगती पाहून अभिमान वाटतो. आत्ताच्या पिढीतील मुलांसोबत तो त्याच उर्जेने काम करतो हे पाहून मन भरून येतं. खुप शुभेच्छा अरूण.'(Arun Kadam Kedar Shinde)
