छोट्या पडद्यावर आपल्या अभिनयाची छाप पाडत प्रेक्षकांची लाडकी ठरलेली चिमुरडी म्हणजे मायरा वायकुळ. सोशल मीडिया स्टार असलेल्या मायराने ‘माझी तुझी रेशीमगाठ’ मालिकेतून प्रेक्षकांच्या मनावर अधिराज्य गाजवलं. तिने साकारलेली परीची भूमिका रसिक प्रेक्षकांच्या विशेष पसंतीस पडली. या मराठी मालिकेतून लोकप्रियता मिळवल्यानंतर मायराने आपली पावलं हिंदी सिनेसृष्टीकडे वळविली. हिंदी मालिकेच्या प्रेक्षकांनाही या चिमुरडीने भुरळ घातली. (Myra Vaikul And CM Eknath Shinde)
अभिनयाव्यतिरिक्त मायराचा सोशल मीडियावरील वावर खूप मोठा आहे. सोशल मीडियावर प्रचंड सक्रिय असणारी मायरा तिचे अनेक फोटोज व व्हिडिओज तिच्या चाहत्यांबरोबर नेहमीच शेअर करत असते. काही दिवसांपूर्वी गणेशोत्सवानिमित्त मायराच्या अनेक व्हिडीओंनी साऱ्यांचं लक्ष वेधून घेतलं होतं. मायराच्या घरीही बाप्पा विराजमान झाले होते, त्यावेळी बाप्पाच्या आगमनाचा व्हिडीओ, बाप्पाला गाऱ्हाणं घालतानाचा व्हिडीओ तसेच बाप्पाच्या विसर्जनावेळचा व्हिडीओ तिने शेअर केला होता.
त्यानंतर आता मायराच्या आणखी एका व्हिडीओने साऱ्यांचं लक्ष वेधून घेतलं आहे. मायराने इन्स्टाग्रामवर एक व्हिडीओ पोस्ट केला आहे. या व्हिडीओला तिने “ग्रेट भेट मा. मुख्यमंत्री महाराष्ट्र राज्य, श्री. एकनाथ शिंदे साहेब”, असं कॅप्शन दिलं आहे. या व्हिडीओमध्ये मायराने मा. मुख्यमंत्री एकनाथ शिंदे यांची भेट घेतली असल्याचं दिसतंय. दरम्यान मुख्यमंत्र्यांनीही चिमुकल्या मायराची विचारपूस केल्याचं कळतंय. तर त्यावेळी मायराने मुख्यमंत्र्यांच्या पाया पडून आशीर्वाद घेतला असल्याचं व्हिडिओत पाहायला मिळालं.
मुख्यमंत्री एकनाथ शिंदे आणि मायरा वायकुळच्या भेटीदरम्यानचे अनेक फोटोस सोशल मीडियावर व्हायरल होत आहे. दरम्यान मायराने नमस्कार करून आशीर्वाद घेतल्याची कृती पाहून अनेकांनी चिमुकल्या मायरा वरील संस्कारांचे कौतुक केले आहे. एका नेटकऱ्याने कमेंट करत म्हटलं आहे की, “संस्कार खूप छान दिले आहेत मायराला”, तर अनेकांनी मायराच्या या व्हिडिओला हार्ट ईमोजी देत कमेंट्स करत पसंती दर्शविली आहे. सध्या मायरा ‘नीरजा – एक नई पहचान’ या मालिकेत मुख्य भूमिकेत पाहायला मिळत आहे.