Chhaya Kadam Video : मराठी तसेच हिंदी चित्रपटसृष्टीत आपल्या दमदार अभिनयाने वेगळी ओळख निर्माण करणारी अभिनेत्री छाया कदम पुन्हा एकदा चर्चेत आली आहे. ‘फॅन्ड्री’, ‘सैराट’, ‘सरला एक कोटी’, ‘झुंड’, ‘लापता लेडीज’ अशा गाजलेल्या चित्रपटांमध्ये प्रभावी भूमिका साकारल्यानंतर छाया कदम आज प्रेक्षकांची आवडती अभिनेत्री म्हणून ओळखली जाते. व्यस्त शूटिंग शेड्यूल आणि सततच्या प्रवासातून काहीसा ब्रेक घेत छाया नुकतीच आपल्या कोकणातील ‘धामापूर’ या मूळ गावी पोहोचली आहे. यावेळी तिने गावातील सरंबळच्या सातेरी देवीच्या जत्रेचे खास क्षण आपल्या सोशल मीडिया अकाउंटवर शेअर केले आहेत.
छायाने शेअर केलेल्या फोटो आणि व्हिडीओमधून कोकणातील जत्रेची पारंपरिक झलक स्पष्ट दिसत आहे. देवीची पालखी, ढोल–ताशा, गावकऱ्यांचा उत्साह आणि विशेषत: मामा मोचेमाडकरांचा दशावतार या लोककलेचे हे सर्व दृश्य तिच्या पोस्टमध्ये पाहायला मिळालं. अनेक वर्षांची परंपरा जपणारी ही जत्रा, गावकऱ्यांसाठी फक्त धार्मिक नव्हे तर सांस्कृतिक आनंदाचा एक मोठा सोहळा असतो.
मोठी सेलिब्रिटी असूनही छाया सामान्य गावकरीप्रमाणे जत्रेत सहभागी होताना दिसून आली. यामुळे अनेक चाहत्यांकडून तिचं विशेष कौतुक केलं जात आहे. जत्रेतील उत्साह, गावातलं साधेपण आणि आपल्या गावाला पुन्हा भेटण्याचा आनंद छायाने सोशल मीडिया पोस्टद्वारे व्यक्त केला आहे. तिने या पोस्टच्या कॅप्शनमध्ये लिहिले की, “सरंबळची सातेरी जत्रा, देवीची पालखी, मामा मोचेमाडकरांचा दशावतार, गाव आणि मी!” असं लिहित तिने भावना व्यक्त केल्या आहेत. याशिवाय तिच्या या पोस्टवर चाहत्यांनी कमेंट आणि लाईक्सचा वर्षाव देखील केला.
आणखी वाचा – मॉड्युलर किचन, आकर्षक इंटेरियर अन्…; आतून असं आहे सूरज चव्हाणचं घर, पाहा Inside Video
छाया कदमच्या करिअरबद्दल बोलायचं झालं, तर तिने अनेक दमदार भूमिका साकारत मराठी आणि हिंदी चित्रपटसृष्टीत तिने तिच्या अभिनयाची एक वेगळीच छाप उमटवली आहे. तिच्या दमदार अभिनयशैलीमुळे ती सदैव चर्चेत राहतेच, पण यावेळी तिच्या गावाकडच्या पोस्टने प्रेक्षकांचं विशेष मन जिंकलं आहे.
