सध्या सर्वत्र ‘बिग बॉस मराठी’ची हवा सुरु आहे. यंदाच्या ‘बिग बॉस’च्या ट्रॉफीवर सोशल मीडिया इन्फ्लुएन्सर्स सूरज चव्हाणने नाव कोरलं. ‘बिग बॉस मराठी’ सीझन ५ या पर्वाचे विजेतेपद मिळवल्यानंतर सूरजचं भरभरुन कौतुक करण्यात आलं. ‘बिग बॉस’ची ट्रॉफी घेऊन आता सूरज त्याच्या गावी बारामतीत परतला आहे. सूरज ‘बिग बॉस’च्या ट्रॉफीसह त्याच्या मोडवे गावातील आई मरिमातेच्या चरणी नतमस्तक झाला आहे. ‘बिग बॉस’च्या घरातून बाहेर पडत विजेतेपद जिंकल्यानंतर आता सूरजचा नवा चित्रपट येणार असल्याचं समोर आलं आहे. (Suraj chavan new movie)
बऱ्याच दिवसांपासून ‘राजा राणी’ या चित्रपटाची चर्चा सुरु असलेली पाहायला मिळाली. या चित्रपटात सूरज महत्त्वपूर्ण भूमिकेत दिसणार आहे. छोट्याशा खेडेगावातून आलेल्या सूरजने झगमगाटीच्या दुनियेत प्रवेश करत उत्तम यश मिळवले. छोटा पडदा गाजवल्यानंतर आता सूरज येत्या १८ ऑक्टोबरपासून मोठा पडदा गाजवायलाही सज्ज होणार आहे. सत्य घटनेवर आधारित उलगडणार्‍या ‘राजा राणी’ या प्रेम कथेतून तो महत्वपूर्ण भूमिका साकारत प्रेक्षकांच्या भेटीस येणार आहे. या चित्रपटात मुख्य कलाकाराच्या दोस्ताच्या भूमिकेत सूरजला पाहणं फारच रंजक ठरणार आहे.
ट्रेलरमध्येही नायक नायिकेच्या प्रेमाला एकत्र आणण्यासाठी सूरज महत्त्वपूर्ण भूमिकेत दिसतोय. ट्रेलरमध्येही त्याचा गोलीगत पॅटर्न पाहणं रंजक ठरतंय. सूरजने त्याच्या इन्स्टाग्राम अकाउंटवरुन ट्रेलर शेअर करत, “भावांनो नमस्कार, मला सांगायला आनंद होत आहे की, मी तुमच्या आशीर्वादाने ‘बिग बॉस’ विजेता झालो. आता माझा खूप आवडता येत्या १८ ऑक्टोबर २०२४ पासून ‘राजाराणी’ नावाचा भारी चित्रपट संपूर्ण महाराष्ट्रात प्रदर्शित होत आहे. जसा ‘बिग बॉस’ला सपोर्ट केला तसा माझ्या ‘राजाराणी’ चित्रपटाला सुद्धा सुपरहिट करा ही विनंती”, असं म्हणत त्याने प्रेक्षकांना विनंती केली आहे.
चित्रपटात प्रमुख भूमिकेत रोहन पाटील, वैष्णवी शिंदे ही जोडी दिसणार असून या चित्रपटात भारत गणेशपुरे, सुरेश विश्वकर्मा, सूरज चव्हाण, माधवी जुवेकर, भक्ती चव्हाण, शिवाजी दोलताडे, तानाजी गलगुंडे या कलाकारांनी महत्त्वपूर्ण भूमिका साकारल्या आहेत. ‘सोनाई फिल्म क्रिएशन’ प्रस्तुत ‘राजाराणी’ या चित्रपटाची कथा, पटकथा, संवाद, गीतलेखन व निर्मिती गोवर्धन दोलताडे यांनी केलं आहे. तर चित्रपटाच्या दिग्दर्शनाची जबाबदारी शिवाजी दोलताडे यांनी सांभाळली आहे. संगीत दिग्दर्शन पी. शंकरम, पार्श्वसंगीत विजय नारायण गवंडे, गायक आदर्श शिंदे, हर्षवर्धन वावरे, अनविसा दत्तगुप्ता, नागेश मोरवेकर हे आहेत. तर छायांकन कृष्णा नायकर, एम. बी. अलीकट्टी यांनी केले आहे. सूरजचा ‘राजा राणी’ हा चित्रपट १८ ऑक्टोबरपासून जवळच्या सिनेमागृहात प्रदर्शित होणार आहे.
