‘बिग बॉस मराठी’मधून घराघरांत पोहोचलेला कलाकार म्हणजे उत्कर्ष शिंदे. उत्कर्षने आजवर आपल्या गाण्यामुळे, अभिनयामुळे व त्याच्या खास लेखनशैलीने सर्वांच्याच मनात स्थान निर्माण केलं आहे. उत्कर्ष हा सोशल मीडियावर चांगलाच सक्रिय असतो. त्याचे अनेक फोटो व कामाबद्दलची काहीही अपडेट तो सोशल मीडियाद्वारे चाहत्यांबरोबर शेअर करत असतो. अशातच त्याने अभिनेता जितेंद्र जोशीबद्दलची एक खास पोस्ट शेअर केली आहे. उत्कर्षने त्याच्या इन्स्टाग्रामवर जितेंद्रबरोबरचे काही खास फोटो शेअर केले आहेत आणि या फोटोखाली त्याने भलीमोठी पोस्ट लिहिली आहे. (Utkarsh Shinde On Instagram)
या पोस्टमध्ये त्याने असे म्हटले आहे की, “निसर्ग तुमच्या उत्कर्षासाठी आपोआप गोष्टी घडवतो अस माझं मत आहे. चार्ल्स डार्विनने ‘सक्षम ते जगतील’ “survival of fittest” असं सांगणारा नैसर्गिक निवडीचा सिद्धांत मांडला. म्हणजेच जे सजीव त्यावेळच्या पर्यावरणास जुळवून घेण्यास सक्षम असतील तेच सजीव पुढील काळात जगतील असे त्यांनी या सिद्धांतात मांडले आहे. माझ्या आयुष्यातही असाच एक चार्ल्स डार्विन आहे. गुरुस्थानी ठेवावी अशी व्यक्ती म्हणजे ‘द जिंतेंद्र जोशी’. मराठीची उत्तम समज असलेला, संवेदनशील अभिनेता, नीडर वक्ता व रोखठोक व्यक्तिमत्त्व म्हणजे जितेंद्र जोशी. आतापर्यंत त्याने ‘सेक्रेड गेम्स’, ‘गोदावरी’, ‘नाळ-२’ अशा अनेक उत्कृष्ट कलाकृती केल्या आहेत. आपल्या अभिनय, गीत व कवितांमधून मराठी सिनेविश्वाला काहीतरी वेगळं देणारा आणि माझ्यासाठी कलाविश्वात गुरुस्थानी असणारा कलाकार म्हणजे जितेंद्र जोशी. नेहमी भेटल्यावर मोठ्या भावाप्रमाणे आधी काळजीपोटी माझ्या खांद्याच्या झालेल्या दुःखापतीची नुसती विचारपूस न करता स्वतः शोल्डर मूवमेंट स्ट्रेंथट्रेनिंग करुन घेणारा, ‘उत्कर्ष तू आता अभिनय क्षेत्रात आला आहेस त्यामुळे खूप काम कर आणि कामात मज्जा-आनंद घे असं सांगणारा कलाकार म्हणजे जितेंद्र जोशी.”
यापुढे त्याने असं म्हटले आहे की, “जगण्याच्या ह्या स्पर्धेत सजीव एकमेकांशी स्पर्धा करत असतात. ही स्पर्धा जीवघेणी असते. या स्पर्धेमध्ये जो जीव जिंकण्यासाठी आवश्यक गुणधर्म दाखवतो तोच जीव टिकतो. कारण निसर्गामध्ये सुयोग्य म्हणजेच योग्य असेच जीव जगतात व बाकीचे जीव मरतात असा डार्विनचा सिद्धांत आहे. याप्रमाणेच नकळतपणे गप्पा मारत मला मार्गदर्शन करणारा, मराठी सिनेमाची दिशा समजवून सांगणारा, स्पर्धा, संघर्ष, मेहनतबद्दल व प्रेक्षकांच्या आवडी-निवडीबदल सतर्कता ठेव सांगणारा, अभिनय क्षेत्रात दिशा, नियमितपणाचे महत्व सांगत संस्कार करणारा. सुतारपक्ष्याचं उदाहरण देत ‘लगे रेहनेका भाई बाकी सब होजाता है’ म्हणजेच सगळं विसरून, कामात झोकून द्यायचं. मग स्वतःची त्या झाडात सुंदर कुपी तयार होतेच, असं सांगणारा, आकाशाला गवसणी घातलेला जमिनीवरचा माणूस, असा हा माझा गुरुस्थानी असलेला मोठा भाऊ. माझा चार्ल्स डार्विन म्हणजे जितू दादा.”
दरम्यान, उत्कर्षने इन्स्टाग्रामवर ही मोठी पोस्ट लिहीत त्याने जितेंद्रचे कौतुक केले आहे. तसेच या पोस्टला अनेक चाहत्यांनी लाईक्स व कमेंट्स करत प्रतिसाद दिला आहे. तसेच कमेंट्समध्ये चाहत्यांनी उत्कर्ष व जितेंद्र या दोन्ही कलाकारांचे कौतुक केले आहे.
