Ghanshyam Darwade On trolling : ट्रोलिंगपासून कोणताही कलाकार काही लांब राहिलेला नाही. अशी अनेक कलाकार मंडळी आहेत जी नेटकऱ्यांच्या तावडीत सापडतात आणि ट्रोलिंगची शिकार होतात. बरेचदा ही मंडळी या ट्रोलिंगला सडेतोड उत्तर देतात, तर काही कलाकार या ट्रोलिंगकडे दुर्लक्ष करतात. अशातच आता ‘बिग बॉस मराठी’ फेम छोटा पुढारीने या ट्रोलिंगवर भाष्य केलं आहे. छोटा पुढारी त्याच्या बेधडक वक्त्यव्यामुळे बरेचदा चर्चेत आलेला पाहायला मिळाला. सोशल मीडियावरही तो नेहमीच काही ना काही शेअर करत चर्चेत असतो. दरम्यान, त्याच्या वक्तव्यांमुळे तो ट्रोलिंगच्या कचाट्यात अडकला आहे. मात्र हे ट्रोलिंग त्याला प्रत्यक्षात आवडतं कारण या ट्रोलिंगमुळेच तो आज आहे असं त्याने नुकत्याच दिलेल्या मुलाखतीत म्हटलं आहे.
‘बिग बॉस’ फेम घन:श्याम दरवडेने नुकतीच ‘इट्स मज्जा’च्या ‘मज्जाच्या अड्ड्यावर’ हजेरी लावली होती. यावेळी बोलताना ट्रोलिंगबाबत तो म्हणाला, “ट्रोलिंग होतंय म्हणून खरंतर मी भाग्यवान आहे. आज माणसांना त्याच्या आयुष्यात वेळ नाही आहे. आणि लोक माझ्या आयुष्यात एवढं तंतोतंत बघत आहेत की, घनःश्याम उठल्यापासून काय करतो आणि काय करत नाही. ट्रोलिंग करणाऱ्यांचे मी मनापासून आभार मानतो, कारण त्यांच्यामुळे मला आज एवढी फेम आहे. आणि ते जर नसते तर घनःश्यामच्या आयुष्याला काय अर्थ राहिला असता. जी मुलं मला ट्रोल करतात तिच समोर आल्यानंतर माझ्या पाया पडतात, नमस्कार करतात आणि म्हणतात मी तुमचा खूप मोठा फॅन आहे”.
पुढे तो म्हणाला, “ग्रामीण भागात असं बोललं जातं की, चावणारे कुत्रे जे भुंकतात ते कधीच चावत नाहीत आणि जे भुंकत नाहीत ते चावतात. ट्रोलिंग करणं म्हणजे कोण आहे जे बेरोजगार आहेत, आई-वडिलांची जीवावर उड्या मारत आहेत तेच आहेत. जे आपापल्या कामात व्यस्त आहेत ते का ट्रोल करतील. त्यांना काही घेणंदेणं नाही. मी तर हे माझं भाग्य मानतो. ट्रोलिंग हे केलं गेलं पाहिजे. ज्या दिवशी लोक ट्रोलिंग करणं थांबवतील त्या दिवशी मी मार्केटमध्ये नसेन. जोवर हे लोक ट्रोलिंग करतील तोपर्यंत मी मार्केटमध्ये असेल. त्यामुळे भावांनो, चांगली जरी पोस्ट असली तरी ट्रोलिंग हे करत जा”.
शेवटी घनःश्याम म्हणाला, “आज सगळ्यात जास्त ट्रोलिंग हे मला केलं जातं आणि सगळ्यात जास्त कामही माझ्याकडे आहेत. ही अगदी अभिमानाची गोष्ट मी सांगतोय. आता ट्रोलिंग मला आवडायला लागलं आहे कारण त्यांच्यामुळे मी आहे. ट्रोलर्सला मी सांगेन की, थोडं तुमच्याही आयुष्यात डोकावून पाहत जा”.
