प्रेक्षकांना आपलंस करण्याची ताकद टेलिव्हीजनमध्ये आहे. कित्येक वर्ष आपण हे अनुभवतही आलो आहोत. कित्येक कलाकार छोट्या पडद्यामुळे घडले, नावारुपाला आले. आजही कलाकारांचं घर टीव्ही इंडस्ट्रीमुळे सुरळीत चाललं आहे असं म्हणणं वावगं ठरणार नाही. मात्र झगमगटीच्या दुनियेत वावरत असताना कलाकार कधीतरी स्वतःकडेही लक्ष देणं विसरतो की काय? असं वाटतं. चेहऱ्यावर सतत हास्य ठेवून इतरांना हसवणारा कलाकार नेहमीच आनंदी आणि सुखी असतो असंही नाही. कित्येकदा त्यांनाही पडद्यामागे खऱ्या आयुष्यात करावी लागणारी कसरत, मेहनत अनेकांना दिसत नाही. असंच काहीसं सध्या सुप्रसिद्ध अभिनेत्री जुई गडकरीबाबत घडत आहे. (Jui gadkari suffer from jaundice)
जुईने आजवर मालिकांमध्ये उत्तमोत्तम भूमिका साकारल्या. तिच्या प्रत्येक भूमिका गाजल्या. प्रेक्षकांनी अगदी जुईला डोक्यावर उचलून धरलं. स्टार प्रवाह वाहिनीवरील ‘ठरलं तर मग’ मालिकेमुळे तर तिला वेगळीच लोकप्रियता मिळाली आहे. ही मालिकाही कायमच टीआरपीच्या शर्यतीत पुढे असते. असं असताना बऱ्याचदा मालिकेती कलाकारांना १२-१२ तास शिफ्ट करुन अधिक कामंही करावं लागतं. जुईचंही तसंच झालं आहे. जुईला आजारपणात काम करावं लागत आहे.
आणखी वाचा – चार मित्रांमुळे गोविंदाचं करिअर फ्लॉप, फक्त वाह वाह करुन…; अभिनेत्याच्या पत्नीचे गंभीर आरोप, नेहमी वाद कारण…
चार ते पाच दिवसांपूर्वी जुईने इन्स्टाग्राम स्टोरीद्वारे आजारी असल्याचं सांगितलं. घरातील फोटो शेअर करत तिने माहिती दिली. शूट, आजारपण सांभाळून करावी लागणारी तारेवरची कसरत जुईच्या या फोटोमध्ये दिसत आहे. जुई म्हणाली, “कृपया कुठेही जाऊन पाणी पिऊ नका. पाणी उकळूनच प्या. त्याचबरोबरीने घरातीलच खाद्यपदार्थ खा. ओषधं, शूटला जाणं आणि नेहमी सलाईन हेच सध्या आयुष्यात सुरु आहे. कावीळ (jaundice) झाली आहे”.
जुई फोटोमध्ये झोपेतून उठून बेडशेजारी बसलेली दिसत आहे. तसेच तिचा चेहराही थोडाफार सुजलेला दिसत आहे. कावीळ असल्यामुळे तिला नेहमी सलाईनही लावावी लागत आहे. काम आणि आजारपण सांभाळताना जुईची तारांबळ उडत आहे. मात्र तरीही थकून न जाता ती तितक्याच जोमाने काम करत आहे. जुईबरोबरच कित्येक कलाकार आजारपण, दुःख लपवून हसऱ्या चेहऱ्याने कॅमेऱ्याला सामोरे जातात. त्यांचं खरंच कौतुक आहे.
