‘बिग बॉस मराठी’मधून घराघरांत पोहोचलेला गायक, गीतकार, संगीतकार व अभिनेता म्हणजे उत्कर्ष शिंदे. उत्कर्षने आजवर आपल्या गाण्यामुळे, अभिनयामुळे व त्याच्या खास लेखनशैलीमुळे सर्वांच्याच मनात स्थान निर्माण केलं आहे. उत्कर्ष हा सोशल मीडियावरही चांगलाच सक्रिय असतो. त्याचे अनेक फोटो व कामाबद्दलची काहीही अपडेट तो सोशल मीडियाद्वारे चाहत्यांबरोबर शेअर करत असतो. त्याचबरोबर तो समाजभानही जपतो. अशीच एक समाजभान जपणारी गोष्ट उत्कर्षबरोबर घडली आणि ही गोष्ट त्याने सोशल मीडियाद्वारे शेअर केली आहे.
उत्कर्षने त्याच्या सोशल मीडियावर एक व्हिडीओ पोस्ट केला असून या व्हिडीओमध्ये उत्कर्षने एका कुत्राच्या पिल्लाचा जीव वाचवला असल्याचे दिसत आहे. हा खास व्हिडीओ शेअर करत त्याने एक पोस्टदेखील लिहिली आहे. या पोस्टमध्ये त्याने असं म्हटलं आहे की, “फायटर’वर संक्रांत आली होती का? माहिती नाही पण ‘संकट’ नक्कीच आलं होतं…छत्रपती संभाजी नगरमध्ये सामाजिक रित्या माझा वाढदिवस साजरा करून भल्या पहाटे मुंबईसाठी परत निघालो. हायवेवर एका मागोमाग भरधाव वेगाने वाहने धावत होती आणि तितक्यात नगर येता येता रस्त्याच्या मधोमध दिसला एक चिमुकला ‘फायटर’. एका पायाने लंगडत हायवेवर त्याच्या आईला शोधत सैरावैरा जीवाच्या आकांताने मधोमध पळणार, घाबरलेलं, वाट विसरलेलं एक चिमुकलं कुत्र्याचं पिल्लू. आमच्या गाडीसमोर ‘फायटर’ दिसताच आम्ही कार कशी बशी कंट्रोल करत रस्त्याच्या कडेला थांबवली. तेव्हा मागून दुसऱ्या कोणत्या तरी गाडी खाली त्याचा जीव जाऊ नये याची भीती होती. तसाच मी गाडीतून उतरुन हायवेवर धावत रस्त्याच्या मधोमध ‘फायटर’च्या मदतीस पोहोचलो, त्याला उचललं. पाहिलं तर एका पायाला जखम असल्याने तो लंगडत होता. विचार केला याची आई जवळ आसपास असेल. याला इथेच झाडात सोडू म्हणजे हा सुखरुप राहील. पण का जाणे ते पिल्लू केविलवाण्या नजरेनं बघू लागलं.”
यापुढे त्याने असं म्हटलं आहे की, “एक क्षण विचार केला आणि पुन्हा त्या पिल्लाला उचललं. गाडीत आमच्याबरोबर घेऊन आलो. त्याला दुसरं कुठे लागलं नाहीना? हे पाहिलं. तो भूकेला असेल, तहान लागली असेल, आधी याला एनर्जी मिळावी म्हणजे हा स्थिर होईल या विचाराने त्या पिल्ला घेऊन पुढे एका धाब्यावर थांबलो, त्याला पाणी पाजलं-बिस्कीट खाऊ घातलं. त्याच्या पायाला औषध लावलं आणि काही काळ आम्ही गुळाचा चहा घेत तिथे थांबलो. तेथील काही चाहत्यांनी सेल्फी घेतले. काहींनी त्या पिल्लाबद्दल विचारपूस केली. मांडीत बसलेला जखमी पिल्लू पाहून तेथील एकाने “मी हे पिल्लू घेऊ का? मी त्याचा सांभाळ करतो सर” म्हणत मायेने त्याला जवळ घेतलं आणि त्याची पुढील जबाबदारी घेतली आणि मनात विचार आला. आता हे पिल्लू जगेल पुढच्या कैक संक्रांती बघण्यासाठी. आजच्या या संकटाला हरवून एका ‘फायटर’सारखा”
“आपण बऱ्याचदा हे विसरून जातो की, आपल्या छोट्याश्या मदतीने कोणावर ओढावणारी वाईट गोष्ट टळू शकते. तुम्ही कोणाची तरी मदत केली तर तुमची मदत करायलाही कोणीना कोणी नक्कीच येईल. आज तिळगुळ देऊन फक्त वरून गोड गोड बोलायचं नाही तर जिथे जाऊ तिथे गोडवा पसरवायचा प्रयत्न करायचा,” असं उत्कर्षनं लिहिल आहे. दरम्यान, उत्कर्षच्या या कृतीमुळे सोशल मीडियावर त्याच्यावर कौतुकाचा वर्षाव होत आहे. या व्हिडीओखाली “आज तुमच्यामुळे एका मुक्या प्राण्याचा जीव वाचला, खुप छान, ग्रेट वर्क, आज ते पिल्लू तुमच्यामुळे वाचलं दादा, हे काम करुन तू सर्वांची मनं जिंकलीस दादा” अशा अनेक कमेंट्सद्वारे नेटकऱ्यांनी उत्कर्षचे कौतुक केले आहे.
