गेल्या काही दिवसांत राखी सावंत अधिक चर्चेत आली आहे. सार्वजनिक ठिकाणी ती नेहमी काही ना काही करताना दिसत असते. अशातच आता राखी पुन्हा एकदा चर्चेत आली आहे. दोन दिवसांपूर्वी अचानक तब्येत खराब झाल्याने तिला रुग्णालयात दाखल केले. तिचे रुग्णालयातील फोटो सोशल मीडियावर व्हायरल झाल्याने तिच्या चाहत्यांना मोठा धक्का बसला. तिच्या तब्येतीवर तिचा पूर्वाश्रमीचा पती रितेशने माहिती दिली. आता पुन्हा एकदा तिच्या तब्येतीबाबतची अपडेट समोर आली आहे. (rakhi sawant tumor surgery)
रुग्णालयात दाखल झाल्यानंतर तिचे सर्व चाहते चिंतेत आले होते. तिच्या गर्भाशयात गाठ असल्याचे रितेशने मध्यमांसमोर सांगितले. त्यामुळे तिच्याबद्दलची चिंता अजूनच वाढली. अशातच तिने आता चाहत्यांसाठी स्वतः संदेश देत काळजी करु नये असे सांगितले आहे. तिने सांगितले की, “मी लवकरच बरी होईन. माझी तब्येत ठीक नाही. डॉक्टरांना माझ्या पोटात १० सेंटीमीटरचा ट्यूमर मिळाला आहे. शनिवारी शस्त्रक्रिया होणार आहे. मी आता जास्त काही बोलणार नाही. पण रितेश माझ्या तब्येतीबद्दल माहिती देतच राहील”.
पुढे ती म्हणाली की, “जेव्हा माझ्यावर शस्त्रक्रिया होईल तेव्हा ट्यूमर मी सगळ्यांना दाखवेन. आता माझे ब्लडप्रेशर व इतर गोष्टी नियंत्रणात आणण्याचा प्रयत्न करत आहे. मी अभिनेत्री आहे डॉक्टर नाही त्यामुळे मला याबद्दल जास्त काही कल्पना नाही”.
त्यानंतर ती म्हणाली की, “येथील डॉक्टर्स चांगले आहेत. ते त्यांचे काम खूप चांगल्या पद्धतीने करत आहेत. मी माझ्या आयुष्यात कधीही हार मानली नाही. लहानपणापासूनच मी संघर्ष पाहिला आहे. मला काहीच होणार नाही हे मला माहीत आहे. माझ्या आईचा आशिर्वाद नेहमी माझ्याबरोबर आहे. हा तर एक छोटासा ट्यूमर आहे. निघूनच जाईल”.
हे सर्व सांगताना राखी खूप भावूक झाली आणि ती रडू लागली. नंतर ती म्हणाली की, “मी परत येऊन नाचेन व गाणेदेखील गाणार. मी लोकांचे मनोरंजन करेन. माझ्या शरीरात गाठ असेल असे मला अजिबात वाटले नव्हते. मी तर टॉवेलमध्ये नाचले होते. जेव्हा मी घरी आले तेव्हा मी बेशुद्ध झाले. रितेश त्याचवेळी मला घेऊन रुग्णालयात पोहोचला. त्यानंतर रिपोर्ट्स आले आणि समजले की ट्यूमर आहे”.
राखीच्या तब्येतीबद्दल सर्वांनाच काळजी लागून राहिली आहे. आता राखी पुन्हा एकदा प्रेक्षकांचे मनोरंजन करण्यासाठी समोर येईल याची चाहते वाट पाहत आहेत.
