भोजपुरी अभिनेत्री अन्नपूर्णा उर्फ अमृता पांडे हिचा २७ एप्रिल रोजी बिहारमधील भागलपूर येथील राहत्या घरी मृत्यू झाला. अभिनेत्रीने आत्महत्या केली असल्याचं समोर आलं आहे. अमृताला बऱ्याच दिवसांपासून चित्रपटात काम मिळत नव्हतं, त्यामुळे ती डिप्रेशनमध्ये गेली होती आणि म्हणूनच तिने आत्महत्या केली. आत्महत्येपूर्वी अभिनेत्रीने तिच्या व्हॉट्सअप अकाउंटवरुन एक गहन विचार करायला लावणारी पोस्ट शेअर केली होती. अभिनेत्रीच्या मृत्यूचा पोलीस तपास करत आहेत. अद्याप अभिनेत्रीच्या मृत्यूचं स्पष्ट कारण समोर आलेलं नाही. भोजपुरी अभिनेत्री अमृता पांडे हिचा बिहारमधील भागलपूर येथील अपार्टमेंटमध्ये संशयास्पद मृत्यू झाला होता. जोगसर पोलीस या प्रकरणाचा तपास करत आहेत. (Amrita Pandey Death)
घटनास्थळाची फॉरेन्सिक सायन्स लॅबोरेटरी (FSL) कडून तपासणी करण्यात आली. घटनास्थळावरून गळ्यातील साडीचा फास, मोबाईल व इतर साहित्य जप्त करण्यात आले आहेत. तिच्या कुटुंबातील सदस्यांनुसार, अभिनेत्रीने भोजपुरी व हिंदी दोन्ही भाषेत अनेक चित्रपट, मालिका, वेबसिरिज आणि जाहिरातींमध्ये काम केले आहे. ‘आयुष्य दोन बोटींवर चाललं आहे, मी माझी बोट बुडवून मार्ग सुकर केला’, असं व्हॉट्सॲप स्टेटस आत्महत्येपूर्वी अमृताने ठेवलं होतं. दरम्यान, जोगसर पोलिसांच्या म्हणण्यानुसार, २७ एप्रिल रोजी संध्याकाळी अभिनेत्रीच्या आत्महत्येची माहिती मिळाली. स्टेशन हाऊस ऑफिसर (SHO) कृष्ण नंदन कुमार सिंग, SI राजीव रंजन आणि शक्ती पासवान काही वेळातच घटनास्थळी पोहोचले. बेडवर तिचा मृतदेह सापडला.
पोलिसांनी माहिती घेतली तेव्हा कुटुंबीयांनी सांगितले की, अमृताची बहीण दुपारी ३.३० वाजता तिच्या खोलीत गेली. तेव्हा ती लटकलेल्या अवस्थेत आढळली. कुटुंबीयांनी फास कापून तिला तातडीने स्थानिक खासगी रुग्णालयात नेले. मात्र डॉक्टरांनी तिला मृत घोषित केलं. अमृताच्या कुटुंबीयांनी असेही सांगितले की, अभिनेत्रीने २६ एप्रिल रोजी तिची बहीण वीणाच्या लग्नात हजेरी लावली. यावेळी तिने खूप धमाल, मस्तीही केली. तिला हे कठोर पाऊल कशामुळे उचलावे लागले हे कोणालाही समजत नाही आहे.
अमृताचा विवाह चंद्रमणी झांगड या ॲनिमेशन इंजिनीअरशी झाला. अभिनेत्रीचा नवरा सध्या मुंबईत राहत आहे. त्यांना मूलबाळ नाही. तिच्या बहिणीच्या म्हणण्यानुसार, अमृता तिच्या करिअरबद्दल खूप चिंतेत होती. ती खूप नैराश्यात होती आणि तिच्यावर याबाबत उपचारही सुरु होते. भोजपुरी चित्रपटांव्यतिरिक्त अमृता एका वेब सीरिजमध्येही काम करत होती. तिने अनेक मालिका व चित्रपटांमध्ये भूमिका साकारल्या होत्या.
