‘चला हवा येऊ द्या’ या लोकप्रिय शोमधून आपल्या निरागस हास्याने सर्वांचे मनोरंजन करणारा विनोदी अभिनेता म्हणून भाऊ कदम यांची लोकप्रियता सर्वश्रुत आहे. ‘चला हवा येऊ द्या’ या शोने त्यांना लोकप्रियतेच्या शिखरावर नेले. या शोमध्ये भाऊ कदम यांनी नानाविध भूमिका साकारल्या. पण या शोमधील त्यांनी साकारलेल्या स्त्री भूमिकांनी प्रेक्षकांचे विशेष लक्ष वेधून घेतले. भाऊ कदम यांनी या शोमध्ये नानाविध प्रकारच्या स्त्री भूमिका साकारल्या आहेत.
भाऊ कदम यांनी साकारलेल्या स्त्री भूमिका चाहत्यांच्याही विशेष पसंतीस पडल्या. त्यांच्या स्त्री भूमिकांना प्रेक्षकांकडूनही उत्तम प्रतिसाद मिळाला. पडद्यावर स्त्री भूमिकांद्वारे प्रेक्षकांचे मनोरंजन करणे हे सोपे काम नसून यातीनंत जबाबदारीचे ते काम आहे. याबद्दल भाऊ कदम यांनी नुकत्याच एका मुलाखतीत भाष्य केले आहे. भाऊ कदम यांनी नुकतीच मज्जा पिंक या युट्यूब चॅनेलला मुलाखत दिली. या मुलाखतीमध्ये त्यांनी स्त्री भूमिका करताना काय काळजी किंवा सावधगिरी बाळगली पाहिजे याविषयी भाष्य केले आहे.
यावेळी भाऊ कदम यांनी असं म्हटलं की, “पेहराव हा खूप मोठा टास्क आहे. नऊवारी साडी नेसताना आपलं त्यामध्ये अंग दिसू नये याची काळजी घ्यावी लागते. मी तर अंग दिसून नये म्हणून साडीला पिना लावून स्टेजवर येतो. कारण बऱ्याचदा मला खूप स्किटमध्ये हालचाल करावी लागते. मुळातच मी जाडा असल्यामुळे पोट वगैरे दिसणं मला वाईट वाटतं. त्यामुळे छान कसं दिसता येईल हे मी कायमच जपतो”.
दरम्यान, भाऊ कदम हे सध्या ‘हसताय ना?, हसायलाच पाहिजे’ या नवीन विनोदी कार्यक्रमामधून पुन्हा एकदा सर्वांना हसवायला सज्ज झाले आहेत. भाऊ कदम स्त्रीपात्र करताना पाहून चांगलेच मनोरंजन होते, पण हे सगळं साकारताना काय गोष्टींना सामोरे जावे लागते? किंवा एखादी स्त्री साकारताना कोणते भान जपले पाहिजे? याविषयी भाऊ कदम यांनी सांगितले आहे.