संगीत नाटक अकादमीच्या वतीने २०२३ या वर्षासाठी संगीत, नाटक, नृत्य क्षेत्रातील पुरस्कारांची घोषणा करण्यात आली आहे. कलाकारांना त्यांच्या कलाक्षेत्रातील योगदानासाठी ‘संगीत नाटक अकादमी पुरस्कार’ जाहीर करण्यात आला आहे. कलाक्षेत्रातील अनेक कलाकार मंडळींना त्यांच्या योगदानासाठी हा पुरस्कार देऊन सन्मानित करण्यात येणार आहे. त्यात महाराष्ट्रातील अभिनेते अशोक सराफ, गायिका देवकी पंडीत व अभिनेत्री ऋतुजा बागवे आदी कलाकारांचाही समावेश आहे.
ज्येष्ठ अभिनेते अशोक सराफ यांना नुकताच ‘महाराष्ट्र भूषण’ पुरस्कार जाहीर झाला. मराठी चित्रपट व नाट्यक्षेत्रातील भरीव योगदानासाठी अशोक सराफ यांना २०२३ वर्षाचा मानाचा ‘महाराष्ट्र भूषण’ पुरस्कार देण्याची घोषणा मुख्यमंत्री एकनाथ शिंदे यांनी केली. नुकतंच मुंबईत मुख्यमंत्री एकनाथ शिंदे व उपमुख्यमंत्री देवेंद्र फडणवीस यांच्या हस्ते अशोक सराफ यांना हा मानाचा ‘महाराष्ट्र भूषण’ पुरस्कार प्रदान करण्यात आला.
अशातच ‘महाराष्ट्र भूषण’ या पुरस्कारानंतर अशोक सराफ यांना ‘संगीत नाटक अकादमी’चा मानाचा समजला जाणारा आणखी एक पुरस्कार जाहीर झाला आहे. तर गायिका देवकी पंडीत यांनाही संगीत क्षेत्रातील त्यांच्या योगदानासाठी हा पुरस्कार जाहीर झाला असल्याचे समोर आलं आहे. तसेच अभिनेत्री ऋतुजा बागवेलाही हा पुरस्कार जाहीर झाला आहे.
ऋतुजा बागवेला तिच्या नाट्यक्षेत्रातील अभिनयासाठी हा पुरस्कार जाहीर झाला आहे. ‘उस्ताद बिस्मिल्लाह युवा खान पुरस्कार २०२२-२३’ हा पुरस्कार जाहीर झाला असून रंगभूमीवरील तिच्या ‘अनन्या’ या नाटकासाठी हा पुरस्कार जाहीर झाला असल्याचं समोर आलं आहे. संपूर्ण भारतात नाटक या क्षेत्रात उल्लेखनीय कामगिरी करणा-यांना हा पुरस्कार दिला जातो. तर नाट्यवर्तुळात या अत्यंत प्रतिष्ठेचा पुरस्कार मानला जातो. ऋतुजाने नुकतीच तिच्या इन्स्टाग्राम स्टोरीद्वारे या पुरस्काराची बातमी शेअर केली आहे.
आणखी वाचा – तापसी पन्नूची लगीनघाई! ‘या’ ठिकाणी पार पडणार लग्नसोहळा, बॉलिवूड कलाकारांना निमंत्रण नसल्याचं आलं समोर
दरम्यान, हे पुरस्कार नवी दिल्लीच्या ‘नॅशनल अकॅडमी ऑफ म्युझिक’, डान्स व ड्रामा यांच्या संगीत नाटक अकादमीच्या वतीने असून एक लाख रुपये मानधन व ताम्रपत्र असं या पुरस्काराचं स्वरुप आहे.
