सध्या सिनेसृष्टीत लगीनघाई सुरु असलेली पाहायला मिळत आहे. अशातच एक मराठमोळी लोकप्रिय जोडी विवाहबंधनात अडकली आहे. तितीक्षा तावडे व सिद्धार्थ बोडके यांचा नुकताच शाही विवाहसोहळा संपन्न झाला. तितीक्षा व सिद्धार्थ यांच्या लग्नामधील लूकची जोरदार चर्चा रंगलेली पाहायला मिळाली. तितीक्षा सध्या ‘सातव्या मुलीची सातवी मुलगी’ या मालिकेत मुख्य भूमिकेत पाहायला मिळत आहे. या मालिकेतील कलाकारांनाही तितीक्षाने लग्नाला निमंत्रित केलं होत. दरम्यान, या मालिकेतील काही कलाकारांनी तितीक्षाच्या लग्नाला हजेरी लावलेली पाहायला मिळाली. (Aishwarya Narkar Mangalsutra)
तितीक्षाच्या लग्नाला सातव्या मुलीची सातवी मुलगी मालिकेतील ऐश्वर्या नारकर, एकता डांगर, सुरुची अडारकर या कलाकारांनी हजेरी लावली. यावेळी अभिनेत्री ऐश्वर्या नारकर यांच्या लूकने साऱ्यांचं लक्ष वेधून घेतलं. ऐश्वर्या नारकर यांचा यावेळचा पारंपरिक लूक साऱ्यांना विशेष भावला. आजवर ऐश्वर्या यांनी त्यांच्या अभिनयाने व सौंदर्याने साऱ्या रसिक प्रेक्षकांची मन जिंकली आहेत. अशातच मैत्रिणीच्या लग्नासाठी जाताना ऐश्वर्या यांनी केलेला खास लूक साऱ्यांना अधिक भावला.
ऐश्वर्या यांच्या या पारंपरिक लूकमधील लक्षवेधी बाब म्हणजे त्यांचं मंगळसूत्र. एकसरी असलेलं काळ्या मण्यांचं व त्याला मुहूर्तमन्यांचं पेंडंट असलेलं पहायला मिळत आहे. लांबसडक असं हे पारंपरिक मंगळसूत्र खूप खास आहे. यावेळी ऐश्वर्या यांनी काठापदराची साडी नेसली होती, शिवाय नाकात नथ घालत त्यांचा मराठमोळा लूक साऱ्यांच्या पसंतीस पडला. तर त्यांच्या गळ्यातील पारंपरिक मंगळसूत्राने त्यांच्या सौंदर्यात आणखी भर घातली.
ऐश्वर्या नारकर सोशल मीडियावरही बऱ्यापैकी सक्रिय असतात. नेहमीच त्या त्यांचे पती अभिनेते अविनाश नारकर यांच्यासह ट्रेंडिंग रील करत शेअरदेखील करतात. हे दोघेही सिनेसृष्टीतील लोकप्रिय कपलपैकी एक आहेत. ऐश्वर्या व अविनाश यांनी आपापल्या अभिनय कौशल्याने प्रेक्षकांची मन जिंकली आहेत. ऐश्वर्या यांच्या अभिनयापेक्षा त्यांच्या सौंदर्याचं विशेष कौतुक होतं. ऐश्वर्या या स्वतःच्या फिटनेसबाबतही विशेष काळजी घेताना दिसतात.
