मराठी सिनेसृष्टीतील एव्हरीग्रीन जोडी म्हणजे अभिनेत्री ऐश्वर्या नारकर आणि अभिनेते अविनाश नारकर. कलाकार म्हणून गेली अनेक वर्ष ही जोडी प्रेक्षकांचं भरभरून मनोरंजन करत आहे. त्यांच्या कामाबरोबर ही जोडी सोशल मीडियावर देखील विशेष चर्चेत असते. ही जोडी ट्रेंडिंग रिल, विविध व्हिडीओ तसेच योगा करतानाचे व्हिडीओ शेअर करताना नेहमीच दिसतात. वयाची पन्नाशी ओलांडली तरी आजही त्यांचा तो उत्साह, काळानुसार पुढे जाण्याची वृत्ती प्रेक्षकांच्या विशेष पसंतीस पडते. (Aishwarya Narkar On Husband)
रिल व्हिडीओवरुन या जोडीला ट्रोलिंगचा बराच सामना करावा लागलेला आहे. एखादा डान्स व्हिडीओ, वर्कआऊट व्हिडीओ शेअर केला तरीही नेटकरी नकारात्मक कमेंट करून त्यांना खडेबोल लगावताना दिसतात. यावर अभिनेत्री ऐश्वर्या नारकर यांनी कित्येकदा भाष्य करत ट्रोलर्सला सडेतोड उत्तरे दिली आहेत. आता ही एव्हरग्रीन जोडी प्रेमात आकंठ बुडाली आहे. नुकताच ऐश्वर्या व अविनाश यांचा एक रोमँटिक व्हिडीओ सोशल मीडियावर धुमाकूळ घालतोय.
अविनाश व ऐश्वर्या दोघेही डेटवर गेले असल्याचा हा रोमँटिक व्हिडीओ आहे. या व्हिडीओमध्ये दोघांचं एकमेकांवर असणार निखळ प्रेम, विश्वास व आदर पाहायला मिळतोय. ही डेट ऐश्वर्या यांनी अविनाश यांच्यासाठी घडवून आणलेली कॅप्शनवरून कळतेय. ऐश्वर्या यांनी हा व्हिडीओ शेअर करत कॅप्शन देत म्हटलं आहे की, “तुझ्यासारखं आश्वासक व काळजी घेणारं कुटुंब मिळाल्याबद्दल मी नेहमीच ऋणी आहे. या प्रेमळ हृदयाच्या माणसाबरोबर मी आहे हा मला मिळालेला एक आशीर्वादचं म्हणायला हवा. हा ‘माणूस’ असा आहे जो केवळ स्वतःच्या कुटुंबाची काळजी घेत नाही तर आर्थिकदृष्ट्या कमकुवत किंवा गरजू अशा जबाबदाऱ्या आनंदाने स्वीकारतो. हे नक्कीच सोप्प नाही.”
“जेव्हा नेटकरी त्याला ट्रोल करतात तेव्हा मला मनापासून असं वाटत की, ट्रोल करण्याआधी तो माणूस म्हणून कसा आहे हे प्रत्येकाने समजून घेतलं पाहिजे. सुखी, भाग्यवान माणूस. प्रत्येक सजीव सृष्टीचा आदर करा मग काहीही असो. तू एक दुर्मिळ रत्न आहेस !!! सदैव आशीर्वादित रहा.” असं म्हणत ऐश्वर्या यांनी पतीची स्तुतीपर पोस्ट शेअर केली आहे. त्यांच्या या पोस्टवर चाहत्यांकडून लाईक्सचा वर्षाव होताना दिसतोय.
