मराठीतील एक सुंदर व उत्तम अभिनेत्री म्हणून तेजस्विनी पंडित नाव अग्रगण्य आहे. तेजस्वीने चित्रपटांपासून वेबसीरिजपर्यंत सर्वच क्षेत्रात आपला ठसा उमठवला आहे. त्याचबरोबर अभिनयासह निर्मिती क्षेत्रातही तिने आपली कारकीर्द केली आहे. मराठी चित्रपटसृष्टीमधील अतिशय लोकप्रिय अभिनेत्री म्हणून तेजस्विनी पंडितची चांगलीच लोकप्रियता आहे. तिची प्रत्येक भूमिका प्रेक्षकांना भलतीच आवडते. तिचा चाहता वर्गदेखील मोठा आहे. त्यामुळे सर्वजण तेजस्विनीच्या आगामी प्रोजेक्ट्सची आतुरतेने वाट पाहात असतात. अशातच नुकतीच तिने तिच्या आगामी प्रोजेक्टची घोषणा केली आहे. (Tejaswini Pandit On Instagram)
तेजस्विनीने तिच्या सोशल मीडियाद्वारे तिच्या आगामी ऐतिहासिक चित्रपटाची घोषणा केली आहे. तेजस्विनी लवकरच राजमाता जिजाबाई शहाजीराजे भोसले यांच्या जीवनावरील चरित्रपटाद्वारे चाहत्यांच्या भेटीला येणार आहे. जगाला दिशा देणाऱ्या या जगत्जननीच्या आयुष्यावर आधारित ‘स्वराज्य कनिका जिजाऊ’ हा चित्रपट लवकरच प्रेक्षकांच्या भेटीला येणार आहे. याबद्दल दिग्दर्शिका अनुजा देशपांडे यांनी असे म्हटले आहे की, राजा नंतर घडतो, आधी घडते ती राजमाता. राजमाता जिजाऊसाहेब या लोकजीवनाला जोडणारी अस्मिता तर आहेतच पण त्याचबरोबर मराठी माणसाला त्याच्या अस्तित्वाची-सामर्थ्याची जाणीव करून देणारी एक शक्ती आहेत. हा अभिमान व जाणीव उराशी बाळगून वीरकन्या ते वीरमातेच्या जीवनकाळचे कथानक २-२.३० तासात मांडणे एक लेखिका म्हणून माझ्यासाठी आव्हानात्मक होते.”
तर तेजस्विनी पंडीतने तिच्या भूमिकेबद्दल भावना व्यक्त करत असे म्हटले आहे की, “ज्या स्त्रीने गुलामगिरीच्या काळोखात जखडलेल्या हिंद प्रांताला स्वतंत्र राज्य – स्वराज्य मिळावे हे स्वप्न पहिल्यांदा पाहिले, त्यासाठी वर्षानुवर्ष त्या झिजल्या, त्या भूमिकेवर अटल राहिल्या. अशा राजमाता स्वराज्य जननी जिजाऊसाहेबांची भूमिका करायला मिळणं ही निश्चितच आनंदाची बाब आहे मात्र त्याहून जास्त जबाबदारी आहे ह्याची मला पूर्ण जाणीव आहे. ज्यांनी छत्रपती शिवाजी महाराजांना जन्म दिला, त्यांना घडवले ती माऊली स्वतः ताकदीची, पराक्रमी आणि दूरदृष्टीची असणार यात कसलेच दुमत नाही .अशा ह्या विलक्षण वीरमातेला पडद्यावर साकारणे हे माझे अहोभाग्यच.’’
दरम्यान, नुकतेच या चित्रपटाचे पोस्टर झळकले असून राजमाता जिजाऊ यांची करारी मुद्रा या पोस्टरद्वारे दिसत आहे. ६ फायरफ्लाईज प्रॉडक्शन्स निर्मित या चित्रपटाचे लेखन व दिग्दर्शन अनुजा देशपांडे या करत आहेत. तसेच तेजस्विनीला जिजामाता भोसले यांच्या भूमिकेत पाहण्यासाठी तिचे अनेक चाहते मंडळी उत्सुक आहेत.
