Swanandi Tikekar and Ashish Kulkarni Marriage : सिनेसृष्टीत लगीनघाई सुरु असताना कलाक्षेत्रातील आणखी एक लोकप्रिय जोडी लवकरच बोहोल्यावर चढणार आहे. ज्येष्ठ अभिनेते उदय टिकेकर यांची लाडकी कन्या स्वानंदी टिकेकर लवकरच लग्नबंधनात अडकणार आहे. टिकेकरांच्या घरी लगीनघाई सुरु झालेली पाहायला मिळत आहे. लग्नापुर्वीच्या विधींना सुरुवात झाल्याचे फोटो सोशल मीडियावर व्हायरल झाले आहेत. अभिनेत्री स्वानंदी टिकेकर गायक आशिष कुलकर्णीसह लग्नबंधनात अडकणार आहे.:
स्वानंदीच्या मेहंदी सोहळ्याने सोशल मीडियावर चांगलाच धुमाकूळ घातलेला पाहायला मिळत आहे. स्वानंदीचा मेहंदीसोहळा अगदी थाटामाटात पार पडला. या सोहळ्याचे अनेक फोटो व व्हिडीओ सोशल मीडियावर तुफान व्हायरल झाले आणि आता त्यांच्या लग्नाआधीच्या विधींनादेखील सुरुवात झाली आहे. सुंदर,आकर्षक अशी सजावट असलेल्या मंडपात स्वानंदीच्या हातावर नक्षीदार मेहंदी काढण्यात आली. स्वानंदीच्या हातावर आशिषच्या नावाची मेहंदी रंगलेली पाहायला मिळत आहे.
स्वानंदी व आशिषच्या या समोर आलेल्या व्हिडीओमध्ये अभिनेत्रीच्या आई- वडिलांनाही थिरकण्याचा मोह आवरला नाही. उदय टिकेकर व त्यांची पत्नी यांनी लेकीच्या मेहंदी सोहळ्यात धम्माल मस्ती करत डान्स केला. यावेळी अभिनेत्री भावुक झालेली पाहायला मिळाली. मेहंदीसाठी स्वानंदी व आशिष यांनी लाल रंगाचे पारंपरिक कपडे परिधान केले होते. तर उदय टिकेकर व त्यांच्या पत्नीने हिरव्या रंगाचे कपडे परिधान केले होते. अगदी नाचत, धमाल मस्ती करत आणि थोडंसं भावुक ही होत स्वानंदीचा मेहंदी सोहळा पार पडला.
काही दिवसांपूर्वी स्वानंदी-आशिष यांनी ‘आमचं ठरलंय’ म्हणत त्यांच्या प्रेमाची जाहीर कबुली सोशल मीडियामार्फत दिली होती. त्यानंतर काही दिवसांनी अगदी दिमाखात त्यांचा साखरपुडादेखील संपन्न झाला होता. अखेरीस त्यांच्या लग्नाच्या तयारीला सुरुवात झाली असल्याचं पाहायला मिळत आहे.
