Swanandi Tikekar and Ashish Kulkarni Marriage : गेले काही दिवस मराठी कलाविश्वात लग्नाची लगबग सुरू असल्याचे पाहायला मिळत आहे. गौतमी-स्वानंद पाठोपाठ गायिका, अभिनेत्री स्वानंदी टीकेकर व गायक आशिष कुलकर्णी देखील नुकतेच विवाहबंधनात अडकले आहेत. त्यांच्या लग्नसोहळ्याचे फोटो नुकतेच समोर आले आहेत. याआधी त्यांच्या मेहंदी, संगीत व हळदी सोहळ्याचे अनेक क्षण सोशल मीडियावर प्रचंड व्हायरल होत होते. त्यांचे हे फोटो पाहून अनेकांना त्यांच्या लग्नाची आतुरता लागली होती आणि अखेर ही लोकप्रिय जोडी नुकतीच विवाहबंधनात अडकली आहे.
अगदी थाटामाटात स्वानंदी-आशिष यांचा विवाहसोहळा संपन्न झाला आहे. त्यांच्या या लग्नसोहळ्याला मराठी कलाविश्वातील अनेक कलाकारमंडळी, त्यांचे कुटुंबीय, तसेच जवळचे काही नातेवाईक व मित्रमंडळीही उपस्थित होते. फुलांनी सजलेल्या मंडपात अत्यंत पारंपरिक पद्धतीने त्यांचा विवाहसोहळा संपन्न झाला असल्याचं समोर आलं आहे. समोर आलेल्या फोटोंमध्ये नववधूवराचा आनंद ओसंडून वाहताना पाहायला मिळाला.
स्वानंदी-आशिष यांच्या लग्नसोहळ्याचे फोटो समोर आले असून यांत दोघेही अत्यंत आनंदी दिसत आहेत. स्वानंदीने लग्नसाठी पिवळ्या रंगाची पैठणी नेसली आहे. त्यावर तिने घेतलेला हिरव्या रंगाचा शेला लक्षवेधी आहे. तर आशिषने लग्नासाठी पांढऱ्या रंगाची शेरवानी परिधान केली आहे. अंत्यत साधा व आकर्षक अशा दोघांचा लूक प्रेक्षकांनाही विशेष भावला आहे.
आणखी वाचा – मराठमोळा पेहराव अन् पारंपरिक दागिने; स्वानंदी-आशिषच्या लग्नाच्या लूकवर पैठणीचा साज
‘दिल दोस्ती दुनियादारी’ या लोकप्रिय मालिकेमधून स्वानंदी घराघरांत पोहोचली. स्वानंदी ही अभिनेत्री असण्याबरोबरच एक उत्तम गायिकादेखील आहे. तिने सिंगिंग स्टार या गाण्याच्या शोमध्ये सहभाग घेतला होता. तसेच आशिष हादेखील एक उत्तम गायक असून त्यानेदेखील ‘इंडियन आयडल’सारख्या शोमध्ये भाग घेतला होता. काही दिवसांपूर्वी स्वानंदी-आशिष यांनी ‘आमचं ठरलंय’ म्हणत त्यांच्या प्रेमाची कबुली दिली होती. नंतर काही दिवसांनी अगदी दिमाखात त्यांचा साखरपुडादेखील संपन्न झाला होता आणि अखेरीस ही जोडीदेसखील विवाहबंधनात अडकल्यामुळे चाहत्यांना आनंद झाला आहे.