झी मराठीवरील ‘का रे दुरावा?’ या मालिकेतून घराघरांत पोहोचलेली अभिनेत्री म्हणजे सुरुची अडारकर. या मालिकेमुळे सुरुचीला प्रचंड लोकप्रियता मिळाली होती. आजही ही मालिका अनेकांची लोकप्रिय मालिका आहे. अशातच गेल्या महिन्यात ही अभिनेत्री अभिनेता पियुष रानडेबरोबर विवाहबंधनात अडकल्यामुळे चांगलीच चर्चेत आली. लग्नामुळे चर्चेत असलेली अभिनेत्री सुरुची अडारकार आता पुन्हा एकदा चर्चेत आली आहे आणि या चर्चेचं कारण म्हणजे अभिनेत्री लवकरच एका नव्या भूमिकेतून प्रेक्षकांच्या भेटीस येत आहे. (Suruchi Adarkar Interview)
सुरुचीने झी मराठी वाहिनीवरील ‘सातव्या मुलीची सातवी मुलगी’ या मालिकेतून पुन्हा एकदा कमबॅक केले आहे. ‘का रे दुरावा’ मालिकेत सुरुचीने साकारलेली अदिती खानोलकर ही भूमिका खूपच गाजली होती. त्यानंतर आता सुरुची पुन्हा त्याच वाहिनीवर पुनरागमन करत आहे. ‘सातव्या मुलीची सातवी मुलगी’ या मालिकेत ती नगिनीच्या भूमिकेत दिसणार आहे. नुकताच या मालिकेचा एक नवीन प्रोमोसमोर प्रेक्षकांच्या भेटीला आला असून यात सुरुचीची एक झलक पाहायला मिळाली आहे आणि अल्पावधीतच या प्रोमोला चाहत्यांनी लाईक्स व कमेंट्सद्वारे चांगलाच प्रतिसाद दिला आहे. अशातच सुरुचीने तिच्या या नवीन भूमिकेबद्दल इट्स मज्जाला तिची प्रतिक्रिया दिली आहे.
यावेळी तिला ‘सातव्या मुलीची सातवी मुलगी’मधील तुझ्या भूमिकेबाबत पियुषला कळल्यावर त्याची काय प्रतिक्रिया होती?’ असा प्रश्न विचारण्यात आला. यावेळी ती म्हणाली, “अगदी खरं सांगायचं तर आम्ही एकमेकांच्या कामामध्ये कधीच येत नाही. पण या मालिकेत काम करण्याचा जेव्हा मी निर्णय घेतला, तेव्हा आमच्यामध्ये अगदी चांगली चर्चा झाली. पियुषला सांगितल्यानंतर तोही अगदी उत्साही होता. त्याचंही तेच म्हणणं होतं की, तू आजवर अशी कोणतीच भूमिका केली नाही. त्यामुळे तुलाही हे काम करताना खूप मजा येईल. त्यामुळे या नव्या भूमिकेसाठी मीही खूप उत्साही आहे.”
दरम्यान, आता लग्नानंतर सुरुची-पियुष आपापल्या कामात व्यस्त झाले असल्याचे पाहायला मिळत आहे. पियुषने लग्नानिमित्ताने ‘काव्यांजली’ या मालिकेतून ब्रेक घेतला होता, पण तो आता पुन्हा एकदा या मालिकेत दिसणार आहे. तर सुरुचीही तिच्या नव्या भूमिकेतून प्रेक्षकांच्या भेटीस येत आहे. त्यामुळे तिचे अनेक चाहते तिला पुन्हा एकदा छोट्या पडद्यावर पाहण्यासाठी चांगलेच उत्सुक आहेत हे नक्की.