झी मराठी वाहिनीवरील ‘माझा होशील ना’ या लोकप्रिय मालिकेतून अवघ्या महाराष्ट्रात लोकप्रिय झालेली अभिनेत्री म्हणजे गौतमी देशपांडे. या मालिकेतील गौतमीची भूमिका प्रेक्षकांनी चांगलीच उचलून धरली. अशातच आज गौतमीचा वाढदिवस आहे. यानिमित्ताने तिला चाहत्यांकडून वाढदिवसाच्या शुभेच्छा दिल्या जात आहे. चाहते मंडळी अनेक प्रकारे तिच्याव शुभेच्छांचा वर्षाव करत आहेत. अशातच गौतमीच्या आयुष्यातील एका खास व्यक्तीने तिला वाढदिवसानिमित्त शुभेच्छा दिल्या आहेत.
गौतमीच्या आयुष्यातील ही खास व्यक्ती म्हणजे तिची बहीण व अभिनेत्री मृण्मयी देशपांडे. ‘देशपांडे सिस्टर्स’मधील अनोखा बॉण्ड हा चाहत्यांना कायमच पाहायला मिळाला आहे. दोघींचे अनेक व्हिडीओला चाहत्यांनी लाईक्स व कमेंट्सद्वारे प्रतिसादही दिला आहे. अशातच मृण्मयीने लाडक्या बहीणीला वाढदिवसाच्या शुभेच्छा देण्यासाठी अक्षरश: तिची झोपमोड केली आहे. हो, ही खरं आहे.
मृण्मयीने शेअर केलेल्या या व्हिडीओमध्ये गाढ झोपलेल्या गौतमीला मृण्मयी प्रचंड त्रास देत असल्याचं पाहायला मिळत आहे. बहिणीची झोपमोड करताना मृण्मयी Happy Birthday बोलून तिला शुभेच्छाही देत आहे. परंतु, एवढा त्रास देऊनही गौतमी शेवटपर्यंत झोपलेलीच दिसत आहे. वाढदिवशीही मोठ्या बहिणीचा त्रास सहन करावा लागला असल्यामुळे अनेकांनी या व्हिडीओखाली कमेंट्समध्ये गौतमीबद्दल सहानुभूती दाखवली आहे.
या व्हिडीओवर गौतमीनेदेखील तिची प्रतिक्रिया दिली आहे. गौतमीने “यासाठी मला न्याय हवा आहे! घरातल्या धाकट्या भावडांनी कृपया कमेंट्समध्ये आपली मतं मांडा. शुभेच्छांसाठी धन्यवाद, पण यासाठी धन्यवाद नाही” असं म्हटलं आहे. दरम्यान, सोशल मीडियावर हा व्हिडीओ व्हायरल होत असून या व्हिडीओवर नेटकऱ्यांनी कमेंट्समध्ये गौतमीला वाढदिवसानिमित्त शुभेच्छा दिल्या आहेत. तसेच मृण्मयीच्या अशा वागण्यामुळे गौतमीबद्दल सहानुभूतीदेखील व्यक्त केली आहे.
