मराठी सिनेसृष्टीतील सध्याच्या आघाडीच्या अभिनेत्रींच्या यादीत अमृता खानविलकरच नाव आवर्जून घेतलं जातं. अमृताने आजवर अनेक चित्रपट, मालिकांमधून प्रेक्षकांची मनं जिंकली आहेत. अमृताच्या चंद्रमुखी चित्रपटातील चंद्रा या गाण्याची आजही प्रेक्षकांमध्ये भुरळ असलेली पाहायला मिळते. केवळ मराठीच मर्यादित न राहता अमृताने बॉलीवूडमध्ये देखील आपला दबदबा निर्माण केला. त्यामुळेच तिचा चाहता वर्ग बऱ्यापैकी मोठा आहे. सोशल मीडियावरही अमृता नेहमीच सक्रिय असते. नेहमीच काही ना काही शेअर करत ती चाहत्यांच्या संपर्कात राहत असते. (Amruta Khanvilkar On Husband)
अशातच अमृताने सोशल मीडियावरुन शेअर केलेल्या एका पोस्टने साऱ्यांचं लक्ष वेधून घेतलं आहे. अमृताने ही खास पोस्ट तिच्या नवऱ्यासाठी केली असल्याचं पाहायला मिळतेय. अमृताच्या नवऱ्याचा म्हणजेच हिमांशू मल्होत्राचा आज वाढदिवस आहे. नवऱ्याचा वाढदिवसानिमित्त अभिनेत्रीने ही खास पोस्ट करत त्याला हटके शुभेच्छा दिल्या आहेत. इतकंच नव्हे तर तिने नवऱ्याचा वाढदिवस क्रूझवर केक कट करत साजरा केला. नवऱ्याबरोबर वेळ घालवल्याचा आणि रोमँटिक पोज देतानाचा हा सुंदर व्हिडीओ अमृताने तिच्या इंस्टाग्राम अकाउंटवरुन शेअर केला आहे.
या खास व्हिडीओखाली कॅप्शन देत तिने हिमांशूला शुभेच्छाही दिल्या आहेत. “वाढदिवसाच्या शुभेच्छा बाळा, तू तुझ्या दयाळूपणाने, सहानुभूतीने आणि प्रेमाने अनेक जीवनांना स्पर्श केला आहेस आणि हे मी अनुभवले आहे. माझ्याकडे तुला शुभेच्छा देण्याशिवाय काहीही नाही. आपली शांतता आपल्या शब्दांपेक्षा जास्त बोलते. तू माझा एक भाग आहेस आणि आता नेहमीच राहशील. या जगात तुझ्याशिवाय काहीही असू शकत नाही”, असं तिने म्हटलं आहे. अमृताच्या या पोस्टवर तिच्या नवऱ्याने कमेंट करत तिने दिलेल्या या गोड सरप्राइजसाठी आभार मानले. कमेंट करत हिमांशू म्हणाला, “या सुंदर सरप्राइजसाठी खूप खूप धन्यवाद अमू. हे सरप्राइज खरंच खूप आवडलं. मलाही तेच वाटतं की, तू नेहमीच माझा एक भाग होतीस, आहेस आणि राहशील”.
आपल्या अभिनयाने व नृत्याने प्रेक्षकांच्या मनावर अधिराज्य गाजवणाऱ्या अमृताने हिंदी टेलिव्हिजन अभिनेता हिमांशू मल्होत्राबरोबर २०१५ मध्ये लग्न केले. इतकी वर्षे ते दोघेही सुखाने संसार करत आहेत, पण दोघेही एकत्र राहत नाही. अमृता मुंबईत राहते तर हिमांशू दिल्लीत राहतो. आणि दोघेही वेगळे राहण्याचं कारण अभिनेत्रीने अनेक मुलाखतींमध्ये सांगितलं आहे. हिमांशू त्याच्या कामानिमित्त दिल्लीत राहत असल्याचं अभिनेत्रीने सांगितलं. मात्र कामाच्या व्यस्त श्येड्युलमधून तो वेळात वेळ काढत मुंबईला अमृतासहही वेळ घालवताना दिसतो.
