Abhijeet Khandkekar On Priya Marathe : प्रिया मराठेच्या निधनानंतर संपूर्ण कलाविश्वावर शोककळा पसरली आहे. गेल्या दोन वर्षांपासून प्रिया कर्करोगाशी झुंज देत होती. गेल्यावर्षी तिची प्रकृती थोडीफार सुधारली होती. मात्र, त्यानंतर तिचा आजार पुन्हा बळावला. या काळात ती सोशल मीडियापासून देखील दूर असल्याचं पाहायला मिळालं. प्रियाच्या निधनाची बातमी समोर येताच सोशल मीडियावर अनेक कलाकारांनी पोस्ट शेअर करत दुःख व्यक्त केलं आहे. तर, प्रार्थना बेहेरे, अभिजीत केळकर, शर्मिला शिंदे, अभिजीत खांडकेकर असे अनेक कलाकार प्रियाला अखेरचा निरोप देण्यासाठी तिच्या मीरारोड येथील घरी पोहोचले होते.
वयाच्या अवघ्या ३८ व्या वर्षी प्रियाने जगाचा निरोप घेतला. आजारपणामुळे प्रियाने मालिकेतून देखील ब्रेक घेतला होता. ‘प्रियाची तुझेच मी गीत गात आहे’ मालिकेतील भूमिका विशेष गाजली. या मालिकेत प्रिया व अभिजीत खांडकेकरची मध्यवर्ती भूमिका पाहायला मिळाली. प्रिया व अभिजीतचा ऑनस्क्रीन बॉण्ड चांगला नसला तरी ऑफस्क्रीन ते चांगले मित्र होते. प्रियाच्या निधनानंतर अभिजीतने इंस्टाग्राम अकाउंटवर भावुक पोस्ट शेअर केली आहे. यावेळी त्याने फोटो, व्हिडीओद्वारेही आठवणी शेअर केल्या आहेत.
अभिजीतने इंस्टाग्रामवर भावुक पोस्ट लिहीत असं म्हटलं की, “नावाप्रमाणे सगळ्यांना प्रिय असलेली प्रिया. अजूनही खरच वाटत नाहीये की तू आता आमच्यात नाही आहेस. भावपूर्ण श्रद्धांजली, अकाली एग्झिट वगैरे शब्द तुझ्या संदर्भात वापरले जात आहेत हे मनाला पटतच नाही. आयुष्य इतकं भरभरुन जगणारी तू शेवटच्या अवघ्या दोन वर्षात काय काय सहन करुन गेलीस याची कल्पना ही करवत नाही”.
पुढे त्याने असं म्हटलं, “शंतनू तू ज्या धीराने तिच्या बरोबर होतास त्याला तोड नाही. लवकर बरी होणार आहेस तू, बरी झालीस की मस्त पार्टी करु. असे आमचे खोटे दिलासे शेवटी निरर्थकच ठरले. तू नसल्याची सवय करुन घ्यावी लागणार आहे. तू अजून हवी होतीस प्रिया”. अभिजीतने शेअर केलेल्या या पोस्टवर अनेक कलाकार मंडळींसह चाहत्यांनीही भावुक कमेंट केल्या आहेत.
