Lagnacha Shot Trailer Launch : लग्न हा केवळ एक विधी नसून आनंद, गडबड, नाती आणि अचानक घडणाऱ्या प्रसंगांची रंगतदार मेजवानी असते. हाच अनुभव प्रेक्षकांपर्यंत पोहोचवण्यासाठी येतोय नवा मराठी चित्रपट ‘लग्नाचा शॉट’. ट्रेलर लॉन्चचा कार्यक्रम पारंपरिक सोहळ्यापेक्षा वेगळा ठरला. हा सोहळा एखाद्या खऱ्या लग्नघरासारखा सजवण्यात आला होता. त्यामुळे उपस्थितांना ट्रेलर पाहण्यापेक्षा जणू एखाद्या लग्नसमारंभात सहभागी झाल्याचा अनुभव मिळाला. कार्यक्रमस्थळी ढोल-ताशांचा गजर, लग्नाची लगबग आणि उत्साह सर्वत्र दिसत होता. या खास सोहळ्यात अभिनेता अभिजीत आमकर याची घोड्यावरून वरात आली, तर प्रियदर्शिनी इंदलकर पालखीतून वाजत-गाजत आली. या सगळ्या वातावरणामुळे कार्यक्रम अधिकच रंगतदार झाला. ट्रेलर लॉन्चला लोकप्रिय अभिनेता स्वप्नील जोशी यांची उपस्थिती लाभली, ज्यामुळे सोहळ्याला खास आकर्षण मिळालं. संपूर्ण कार्यक्रमात लग्नाचा गोंधळ, आनंद आणि उत्साह अनुभवायला मिळत होता, जो अगदी चित्रपटाच्या संकल्पनेला साजेसा होता. ‘लग्नाचा शॉट’ हा चित्रपट लग्नाच्या गडबडीतून उलगडणाऱ्या रंजक आणि अनपेक्षित क्षणांचा अनुभव मोठ्या पडद्यावर देणार असल्याचं या ट्रेलर लॉन्चमधून स्पष्ट झालं आहे..
ट्रेलरमध्ये एका लग्नाच्या तयारीपासून सुरू होणारी गोष्ट पुढे कशी अनपेक्षित वळणं घेते, याची रंजक झलक पाहायला मिळते. चुकीचे निर्णय, नात्यांमधील गैरसमज आणि त्यातून निर्माण होणारा गोंधळ हे सगळं अगदी हलक्याफुलक्या, विनोदी शैलीत प्रभावीपणे मांडण्यात आलं आहे. अभि आणि कृतिकाच्या आयुष्यात अचानक घडणाऱ्या घटनांमुळे त्यांचा प्रवास वेगळ्याच दिशेने वळतो. या प्रवासात अनेक मजेशीर प्रसंगांसोबत काही भावनिक क्षणही पाहायला मिळतात. दिग्दर्शक अक्षय गोरे म्हणतात, ’’लग्न हा प्रत्येकाच्या आयुष्यातील अत्यंत महत्त्वाचा आणि जिव्हाळ्याचा सोहळा असतो. त्या एका दिवसासाठी अनेक स्वप्नं, अपेक्षा आणि भावना गुंफलेल्या असतात. पण अनेकदा या आनंदाच्या क्षणांमध्ये काही अनपेक्षित गोष्टी घडतात आणि संपूर्ण आयुष्याला वेगळं वळण मिळतं. ‘लग्नाचा शॉट’ची कथा अशाच अनपेक्षित प्रसंगांमधून आकाराला आली आहे. या चित्रपटातून आम्ही नुसतं हसवणारं मनोरंजन न देता, नात्यांमधील गोंधळ, गैरसमज आणि त्या परिस्थितीतून बाहेर पडण्याचा प्रवास हलक्याफुलक्या पद्धतीने मांडला आहे. प्रेक्षकांनी थिएटरमध्ये येऊन या प्रवासाचा आनंद घ्यावा आणि स्वतःला या गोष्टींशी कुठेतरी जोडून घ्यावं, अशी माझी मनापासून इच्छा आहे.” (Lagnacha Shot Trailer Launch)
आणखी वाचा – “मला १२ वाजता का बोलवलं?” O’Romeo च्या ट्रेलर लॉँचमध्ये रागातून उठून गेले नाना पाटेकर; नेमकं काय घडलं?
महापर्व फिल्म्स निर्मित आणि जिजा फिल्म कंपनी यांच्या सहयोगाने साकारलेल्या ‘लग्नाचा शॉट’ या चित्रपटाचे लेखन-दिग्दर्शन अक्षय गोरे यांनी केले आहे. गीत-संगीताची धुरा प्रवीण कोळी आणि योगिता कोळी यांनी सांभाळली असून अक्षय महादेव गोरे, विजय महादेव गोरे, अभिषेक उत्कर्ष कोळी आणि सुरेश मगनलाल प्रजापती हे या चित्रपटाचे निर्माते आहेत. ६ फेब्रुवारी रोजी प्रदर्शित होणाऱ्या या चित्रपटात प्रियदर्शिनी इंदलकर, अभिजीत आमकार, प्रभाकर मोरे, अभिजीत चव्हाण, राजन ताम्हाणे, लीना पंडित, संजय कुलकर्णी, विजय पवार, मनोहर जाधव, संजीवनी पाटील यांच्या प्रमुख भूमिका आहेत. (Lagnacha Shot Trailer Launch)
