बॉलिवूड कलाकार हे कोणत्या ना कोणत्या कारणामुळे कायम चर्चेत असतात. अशातच सध्या बॉलिवूडमध्येही कलाकारांचे विशेष समारंभ पार पडताना दिसत आहेत. काही दिवसांपूर्वी बॉलिवूडचा मिस्टर परफेक्शनिस्ट आमिर खानच्या लेकीचा म्हणजेच आयरा खान हिचा साखरपुडा झाला. आयरा फिटनेस कोच नुपूर शिखरेबरोबर लवकरच लग्नबंधनात ही अडकणार आहे. आयरा व नूपुरच्या साखरपुडा सोहळ्यातील कधीही न पाहिलेले फोटोस सध्या सोशल मीडियावर व्हायरल होत आहेत. (Aamir Khan Daughter Viral Post)
आमिरची लेक आयरा खान नेहमीच चर्चेत असते. आयरा सोशल मीडियावरही प्रचंड सक्रिय असते. तिच्या पोस्ट नेहमीच चर्चेत असतात. अशातच अनेकदा तिला ट्रोलिंगचा ही सामना करावा लागतो. तिच्या बोल्ड कपड्यांमुळे तसेच नवऱ्याबरोबरचा रोमान्स सोशल मीडियावर व्हायरल झाल्यावर नेटकरी तिला चांगलच ट्रोलिंगच्या कचाट्यात अडकवतात. अशातच आयराची आणखी एक पोस्ट सध्या लक्ष वेधून घेतेय. आयराने ही पोस्ट तिच्या होणाऱ्या पतीसाठी शेअर केली आहे. या पोस्टमध्ये आयराने तिच्या साखरपुड्यातील काही खास क्षण ही शेअर केले आहेत.
आयराच्या या पोस्टमध्ये तिने नुपूरसाठीच्या खास भावना शेअर करत म्हटलं आहे की, “माझ्या आयुष्यातल्या सगळ्यात भारी व खास व्यक्तीला भेटलात का? त्याने माझ्या मनात आणि आयुष्यात खास स्थान निर्माण केलं आहे. बऱ्याच महिन्यांपासून मला हे लिहायचं होतं. पण आजही मला नाही वाटत की, माझ्या मनात आहे ते मी शब्दांत लिहू शकते. तू मला पुढं जाण्यासाठी मदत केली. तुझ्यामुळं मी बऱ्याच गोष्टी विसरू शकले. तू एखाद्या लहान मुलासारखी काळजी घेतली. मला गरज होती तेव्हा तू माझ्यासोबत होतास.”
आयरा व नुपूर यांनी गेल्या वर्षी नोव्हेंबरमध्ये साखरपुडा सोहळा उरकला. त्यांच्या साखरपुड्याला बॉलिवूड जगतातील अनेक कलाकारांनी हजेरी लावली होती. लवकरच आता आयरा नुपूर शिखरेबरोबर लग्नबंधनात अडकणार असल्याचं समोर आलं आहे. ईटाइम्सने दिलेल्या वृत्तानुसार, आयरा खान व नुपूर शिखरे ३ जानेवारीला कोर्ट मॅरेज करणार असल्याचं समोर आलं आहे. त्यानंतर ते राजस्थानच्या उदयपूरमध्ये मोठ्या थाटामाटात लग्न करणार आहेत. हे लग्न जवळच्या मित्र परिवाराबरोबर व कुटुंबियांच्या उपस्थित करणार असल्याचं समोर आलं आहे.
