देशातील सर्वात प्रतिष्ठित चित्रपट पुरस्कारांपैकी एक असलेल्या ६९वा राष्ट्रीय चित्रपट पुरस्कार प्रदान सोहळा नुकताच पार पडला. या कार्यक्रमादरम्यानचे खास क्षण प्रत्येकजण सोशल मीडियावरून शेअर करताना दिसत आहे. राष्ट्रपती द्रौपदी मुर्मू यांच्या हस्ते यंदाच्या पुरस्कार विजेत्यांना सन्मानित करण्यात आले. यंदा हिंदी व दाक्षिणात्य चित्रपटांसह मराठी चित्रपटांनीही पुरस्कारांवर नाव कोरलं. नेहमीप्रमाणे यंदाच्या राष्ट्रीय पुरस्कारांमध्ये मराठी चित्रपटांनी आपली छाप पाडली. सर्वोत्कृष्ट मराठी चित्रपटाचा पुरस्कार सलील कुलकर्णी यांच्या ‘एकदा काय झालं’ या चित्रपटाने पटकावला. (Saleel Kulkarni Emotional Post)
या पुरस्कार सोहळ्याला सलील कुलकर्णी यांनी कुटुंबासह हजेरी लावली होती. या सोहळ्यादरम्यानचा एक भावुक करणारा फोटो त्यांनी सोशल मीडियावरून शेअर केला आहे. इंस्टाग्राम स्टोरी पोस्ट करत त्यांनी एक लक्षवेधी पोस्ट शेअर केली आहे. या पोस्टमध्ये त्यांनी त्यांच्या आई बरोबरचा फोटो पोस्ट केला आहे. एका फोटोमध्ये सलील यांची आई त्यांना राष्ट्रीय पुरस्कार सोहळ्याला देण्यात येणारा बॅच लावताना दिसत आहे. तर आणखी एक शेअर केलेला त्यांचा हा फोटो लहानपणीचा असलेला पाहायला मिळतोय. या फोटोमध्ये त्यांच्या आईने सलील यांना कडेवर उचलून घेतलेलं पाहायला मिळतंय.
सलील यांनी आईबरोबरचे हे फोटो शेअर करत लक्षवेधी कॅप्शन दिलं आहे, “बालवाडीत शाळेत जातांना तिने माझ्या शर्टाला पिनअप केलेला रूमाल ते राष्ट्रीय पुरस्कार सोहळ्याला लावलेला हा विशेष बॅच. सगळं अगदी तसंच आहे. तिच्या डोळ्यातलं कौतुक आणि माझं तिला “आई… हे करून दे ना” हे सांगणं.” असं म्हणत त्यांनी ही पोस्ट शेअर केली आहे. त्यांच्या या पोस्टवर अनेक कलाकार मंडळींनी तसेच त्यांच्या चाहत्यावर्गाने कमेंट व लाईक्सचा वर्षाव केला आहे. सलील यांनी त्यांच्या चित्रपटाला मिळालेला पुरस्कार त्यांच्या कुटुंबियांना समर्पित केला आहे.
‘एकदा काय झालं’ या चित्रपटात डॉ. सलील कुलकर्णी यांनी एका गोष्ट सांगणाऱ्या बाबाची कहाणी सादर केली आहे. या चित्रपटाचं लेखन,पटकथा,संवाद,संगीत व दिग्दर्शन डॉ. सलील कुलकर्णी यांनी केलं आहे. या चित्रपटात अभिनेता सुमित राघवन, मोहन आगाशे, पुष्कर श्रोत्री, अभिनेत्री उर्मिला कानिटकर, सुहास जोशी यांसारख्या अनेक दिग्गज कलाकारांच्या भूमिका होत्या.
