बॉलिवूडचा मिस्टर परफेक्शनिस्ट म्हणजेच आमिर खानच्या घरात सध्या लगीनघाई सुरु असल्याचं पाहायला मिळत आहे. अभिनेत्याची मुलगी इरा खान तिचा बॉयफ्रेंड नुपूर शिखरेबरोबर लग्नगाठ बांधणार आहे. इरा व नुपूर यांच्या लग्नापुर्वीच्या विधींना सुरुवात झाली आहे. आमिर खानची मुलगी इरा खान व नुपूर शिखरे यांचा गेल्या वर्षी सप्टेंबर महिन्यात इटली येथे साखरपुडा सोहळा संपन्न झाला. साखरपुड्यातील दोघांच्या रोमँटिक फोटोंनी साऱ्यांचं लक्ष वेधून घेतलं. (Ira khan and nupur Shikhare Wedding)
साखरपुड्याच्या दोन महिन्यांनंतर त्यांनी एका पार्टीचे आयोजन केले होते. आमिरचे संपूर्ण कुटुंब तसेच त्याची माजी पत्नी रीना दत्ता व किरण राव, अभिनेत्री फातिमा सना शेख यांच्यासह जवळचा मित्रपरिवार या पार्टीत सहभागी झाला होता. इरा व नुपूरच्या साखरपुड्याची फोटोही सोशल मीडियावर चांगलेच व्हायरल झाले होते. यानंतर आता अखेर आमिरच्या लेकीचा लग्नसोहळा जवळ आला आहे. इरा व नुपूर ३ जानेवारीला लग्नबंधनात अडकणार आहेत.
‘न्यूज १८’च्या वृत्तानुसार, आमिर खानच्या मुलीच्या लग्नाच्या कार्यक्रमाची माहिती सूत्रांकडून मिळाली आहे. अहवालानुसार, एका सूत्राने सांगितले की, “खान कुटुंब इराच्या लग्नासाठी खूप आनंदी आहे कारण ते नवीन वर्षाची धमाकेदार सुरुवातचं लग्नसोहळ्याने करणार आहेत. इरा व नुपूरचे लग्न ३ जानेवारी रोजी वांद्रे येथील ताज लँड्स एंड या आलिशान हॉटेलमध्ये होणार आहे. यानंतर ६ ते १० जानेवारी दरम्यान दोन रिसेप्शन पार्टीचं आयोजन करण्यात आलं आहे. यापैकी एक रिसेप्शन दिल्ली येथे तर दुसरे रिसेप्शन जयपूरमध्ये होणार आहे.
रिपोर्टनुसार, असेही समोर आले आहे की, आमिर त्याच्या लेकीच्या लग्नासाठी खूप उत्साहित आहे. तसेच अभिनेता स्वतः बी-टाऊनमधील त्याच्या मित्रांना, सहकाऱ्यांना लग्नाला उपस्थित राहून नववधूवराला आशीर्वाद देण्यासाठी फोन करुनआमंत्रित करत आहे. अहवालानुसार, बहुतेक कलाकार हे सुट्टीसाठी बाहेर गेले आहेत. ज्यांना या लग्नाला येता येणार नाही ते जयपूरमधील रिसेप्शनचा भाग असतील. इरा खान व नुपूरचे लग्न महाराष्ट्रीय रितीरिवाजानुसार होणार आहे.
