महाराष्ट्रात नुकतेच विधानसभा निवडणुकांचे बिगुल वाजले आहे. यामुळे सगळेच राजकीय पक्ष तयारीला लागलेत. निवडणूकांच्या आधी राजकीय पक्षांत प्रवेश केला जातो. काही दिवसांपूर्वी दक्षिण व मराठीतील सुप्रसिद्ध अभिनेते सयाजी शिंदे यांनी अजित पवार यांच्या राष्ट्रवादी पक्षात प्रवेश केला. अशातच एका लोकप्रिय अभिनेत्रीनेही नुकतीच राजकारणात एन्ट्री केली आहे आणि ही लोकप्रिय अभिनेत्री म्हणजे अश्विनी महांगडे. ‘आई कुठे काय करते’ व ‘स्वराज्यरक्षक संभाजी’ मालिका फेम अश्विनी महांगडेने नुकताच राष्ट्रवादी काँग्रेस, शरद पवार गटात प्रवेश केला आहे. (Ashwini Mahangade Politics Entry)
अश्विनी सोशल मीडियावर बऱ्यापैकी सक्रिय असून तिने तिच्या सोशल मीडियाद्वारे अनेकदा सामाजिक व राजकीय मुद्द्यांवर आपली मतं मांडली आहेत. यामुळे तिच्या राजकारणातील प्रवेशाबद्दल बऱ्याच चर्चा होत होत्या आणि या चर्चा अखेर खऱ्या ठरल्या आहेत. अश्विनीला शरद पवार गटात महाराष्ट्र राष्ट्रवादी महिला कार्यकारिणीचं उपाध्यक्षपद देण्यात आलं आहे. साताऱ्यातील वाई इथे राष्ट्रवादी काँग्रेस पक्ष, शरद पवार गटाच्या शिवस्वराज्य यात्रेच्या मेळाव्यात अश्विनीने पक्षप्रवेश केला आहे. यावेळी जयंत पाटील, अमोल कोल्हे व बाळासाहेब पाटील हे देखील उपस्थित होते.
आणखी वाचा – 17 October Horoscope : मेष, सिंह व कुंभ राशीच्या लोकांसाठी गुरुवारचा दिवस कसा असेल, जाणून घ्या…
याबद्दल अश्विनीने सोशल मीडियावर खास फोटो शेअर केले असून तिने एक पोस्टही लिहिली आहे. यात तिने असं म्हटलं आहे की, “माझे वडील स्व. प्रदीपकुमार महांगडे (नाना) यांनी कायम मा. शरदचंद्रजी पवार साहेबांच्या नेतृत्वाखाली काम केले. अगदी गावातल्या निवणुकांपासून ते लोकसभा, विधानसभा निवडणुकीच्या काळात अगदी झोकून देऊन ते काम करायचे. जेवायला बसल्यावर चर्चासुद्धा त्याच. राजकारण हा त्यांचा आवडता विषय. लोकांच्या मदतीला धावून जाणे हे त्यांच्या रक्तातच होते. त्यांना कायम कार्यकर्ता बनून राहायला आवडायचे”.
यापुढे तिने म्हटलं की, “पण साधारण ४ वर्षांपूर्वी त्यांना जाणवले की ताई (मी) समाजासाठी काम करू शकते, त्यांच्यासाठी उभी राहू शकते आणि पक्षाने जबाबदारी दिली तर काम करण्याचा आवाका वाढेल. हे त्यांचे स्वप्न अर्थात ४ वर्षानंतर कोजागिरी पौर्णिनेच्या मुहूर्तावर पूर्ण झाले. ही नवीन जबाबदारी मला अजून घडवेल. समाजासाठी काम करायची जाणीव सतत करून देईल. स्वीकारलेले काम जबाबदारीने पूर्ण करण्याचा प्रयत्न मी नक्की करेन. यात अनेक लोकांचे आशीर्वाद आणि शुभेच्छा होत्या म्हणून हे शक्य झाले. त्यांचे आभार”.
