महाराष्ट्रातील लाखो वहिनींचा हक्काचा आणि लोकप्रिय कार्यक्रम ‘होम मिनिस्टर’ या छोट्या पडद्यावरील कार्यक्रमाने १९ वर्ष पूर्ण करून २०व्या वर्षात पदार्पण केले आहे. या कार्यक्रमाचे सूत्रसंचालक आदेश बांदेकर यांनी ‘दार उघड बये दार उघड’ म्हणत महाराष्ट्रातील तमाम वहिनींना बोलतं केलं. त्यांच्यासोबत विविध खेळ खेळत बक्षिसांच्या रूपात पैठणी देत वहिनींचा सन्मान केला. सायंकाळी महिलावर्गाच्या मालिकांची सुरुवातच ‘होम मिनिस्टर’ या कार्यक्रमाने सुरु होते. (Aadesh Bandekar On Khel Mandiyela)
‘होम मिनिस्टर’ या कार्यक्रमाचे आणि या कार्यक्रमाचे सूत्रसंचालक आदेश बांदेकर यांचा खूप मोठा फॅन फॉलोविंग आहे. महाराष्ट्रातचं नव्हे तर परदेशातील महिला वर्गालाही या कार्यक्रमाची भुरळ पडली आहे. आदेश बांदेकर पैठणी घेऊन कधी येणार असं सर्वच महिलांना वाटत असतं. आता मात्र परदेशातील महिलावर्गासाठी आदेश बांदेकर एक आनंदाची बातमी घेऊन आले आहेत. ‘महाराष्ट्र मंडळ, दुबई’ यांच्या वतीने आयोजित ‘खेळ मांडियेला’ या कार्यक्रमासाठी यंदाच्या दिवाळीत बांदेकर दुबईला पैठणी घेऊन जात आहेत.
याचा एक व्हिडीओ आदेश बांदेकर यांनी इंस्टाग्रामवरून शेअर केला आहे. यांत दुबईला कार्यक्रमासाठी जातानाचा आनंद व्यक्त करत ते म्हणाले, “नमस्कार, २००४ या वर्षांमध्ये ‘होम मिनिस्टर’ हा कार्यक्रम सुरु झाला. काय बांदेकर आमच्या घरी कधी? असा प्रश्न घराघरातून विचारला जाऊ लागला. त्याचबरोबर परदेशातूनही बांदेकर आमच्या घरी कधी असं विचारत होते. आणि तो योग आता जुळून आला आहे. २०२३ वर्षातील दिवाळीच्या पूर्वसंध्याकाळी ‘महाराष्ट्र मंडळ दुबई’ यांच्यावतीने सुवर्णपर्व साजरं होतंय. इतकी वर्ष जल्लोषात कार्यक्रम साजरे केल्यानंतर माय माऊलींना आनंद देणाऱ्या या कार्यक्रमात तसेच तुम्ही या सुवर्णपर्वात, हा सुवर्ण क्षण, हा आनंद द्विगुणित करण्यासाठी या. त्याचबरोबर हा जल्लोष साजरा करत असताना आनंदाची आतषबाजी करण्यासाठी दिवाळीच्या पूर्वसंध्येला मी येतोय ‘महाराष्ट्र मंडळ दुबई’ यांनी आयोजित केलेल्या ‘खेळ मांडियेला’ या कार्यक्रमासाठी. तेव्हा बघूया दुबईतली पैठणी कोण जिंकणार. येतोय लवकरच दुबईला.”
तर आणखी एक दुबईच्या दिशेने प्रवास सुरु करत आदेश बांदेकर यांनी एक व्हिडीओ सोशल मीडियावरून पोस्ट केला आहे, यांत ते म्हणत आहेत की, “दुबईच्या दिशेने, मुंबई एअरपोर्टवर पोहोचलेलो आहे. आणि निघालो आहे ‘खेळ मांडियेला’च्या पहिल्या आंतरराष्ट्रीय कार्यक्रमासाठी दुबईच्या दिशेने. तेव्हा येत आहे ‘खेळ मांडियेला’ हा कार्यक्रम घेऊन दिवाळीच्या पूर्वसंध्येला दिवाळी साजरी करण्यासाठी दुबईमध्ये. मी येतोय ‘महाराष्ट्र मंडळ दुबई’ यांनी आयोजित केलेल्या ‘खेळ मांडियेला’ या कार्यक्रमासाठी. तर बघुयात दुबईतील पहिली पैठणी कोण जिंकणार.
