‘नवरी मिळे हिटलरला’ मालिका अनेक रंजक वळणं घेत आहे. ही मालिका प्रेक्षकांच्या भलतीच पसंतीस पडत आहे. अभिराम व लीलाची जोडी प्रेक्षकांना विशेष भावतेय. नुकत्याच झालेल्या वटपौर्णिमेला लीलाने एजेसाठी वडाच्या झाडाला १००१ प्रदक्षिणा घातल्या. तेव्हा वाटलं की आता लीला व एजे यांचे नातं रुळावर येईल. पण एजे-लीलाच्या आयुष्यात सगळंच गोड गोड कसं असेल. हळूहळू एजे-लीलाच्या संसाराची गाडी पुढे सरकत आहे. दोघे ही आजीच्या सांगण्यावरुन एका खोलीत राहायला तयार होतात. (Navri Mile Hitlerla Reception)
एकमेकांच्या नजरेलाही नजर देत नाहीत अशा दोन व्यक्तींसाठी एका खोलीत राहणे म्हणजे तारेवरची कसरत, अशा या कठीण परिस्थितीत एजे व लीला एकत्र राहू लागतात. एजेला एसी शिवाय जमत नाही आणि लीला बिचारी एसीमध्ये गारठून जाते. तसेच लीलाला अंधाराची भीती आहे तर एजेला उजेडात झोपायची सवय नाही, या अशा परिस्थितीत दोघांच्या सुखी संसाराला फक्त सुरुवात झाली आहे. हे सर्व होत असताना एजे-लीलाच्या रिसेप्शनचा दिवसही जवळ आला आहे.
घाईघाईत आणि अनपेक्षित झालेल्या या लग्नानंतर आता एजे व लीला यांचा रिसेप्शन सोहळा पार पडनार आहे. नुकताच एजे व लीलाच्या रिसेप्शनचा एक व्हिडीओ समोर आला आहे. या व्हिडीओमध्ये असं पाहायला मिळत आहे की, या रिसेप्शनला खास पाहुण्यांना आमंत्रित करण्यात आलं आहे. इतकंच नव्हे तर एजे व लीला यांच्या या खास रिसेप्शनला या कलाकार मंडळींनी खास परफॉर्मन्सही केला आहे.
या सोहळ्याला ‘पारू’ मालिकेतील पारू व आदित्य यांनी पारंपरिक अंदाजात हजेरी लावली, रोमँटिक गाण्यावरही दोघे थिरकले. इतकंच नव्हे तर ‘तुला शिकवीन चांगलाच धडा’ मालिकेतील अक्षरा व अधिपती यांनी यावेळी उपस्थिती दर्शिवली आणि स्पेशल डान्स केला. तर ‘अप्पी आमची कलेक्टर’ मालिकेतील अप्पी व अर्जुन यांचीही एजे व लीलाच्या रिसेप्शनला हजेरी होती. दोघांनी एकत्र एक सुंदर असा परफॉर्म्सनही केला. आणि एजे व लीलाला शुभेच्छा दिल्या.
